எல் நினோ என்பது பசிபிக் பெருங்கடலில் கடல் நீர் வெப்பமடைவதுடன் தொடர்புடைய இயற்கை காலநிலை நிகழ்வு. இது காலநிலை மாற்றத்தால் உருவாகவில்லை. எனினும், புதைபடிவ எரிபொருள் எரிப்பால் ஏற்கனவே வெப்பமடைந்து வரும் பூமியில், இதன் விளைவுகள் வெப்பத்தையும் தீவிர வானிலையையும் மேலும் அதிகரிக்கலாம்.
ஐரோப்பாவில் எல் நினோ தாக்கம் எவ்வாறு இருக்கும்?
உலக வானிலை அமைப்பின் கணிப்புப்படி, எல் நினோ ஆகஸ்ட் மாதம் முதல் காலநிலை அமைப்புகளை அதிகமாக பாதிக்கத் தொடங்கும். இந்த நிகழ்வு ஆண்டு இறுதியில் உச்சத்தை அடையலாம். பிப்ரவரி வரை நீடிக்கக்கூடும். இதன் மறைமுக விளைவுகள் 2027ஆம் ஆண்டு வரையிலும் தொடரலாம்.
2026 அல்லது 2027ஆம் ஆண்டு பதிவுகளில் அதிக வெப்பமான ஆண்டாக அமைய வாய்ப்புள்ளதாக நிபுணர்கள் கூறுகின்றனர். தற்போதைய எல் நினோ, நான்கு தசாப்தங்களாக பதிவுகள் தொடங்கிய காலத்திலிருந்து மிகவும் வலுவானதாக இருக்கலாம் எனவும் எச்சரிக்கை விடுக்கப்பட்டுள்ளது.
ஐரோப்பா நேரடி மற்றும் மிகக் கடுமையான விளைவுகளை சந்திக்காமல் இருக்கலாம். இருந்தாலும், வெவ்வேறு பகுதிகளில் வெவ்வேறு மாற்றங்கள் ஏற்படலாம். ஐரோப்பிய ஆணையத்தின் வழிகாட்டுதல்படி, வழக்கமாக காணப்படும் குளிர்ச்சிக்கு பதிலாக, இலையுதிர் காலத்திலும் குளிர்காலத்திலும் வழக்கத்தை விட அதிக வெப்பம் நிலவலாம். இந்த வெப்பம் 2027 வசந்தகாலம் வரை அதிகரிக்கக்கூடும்.
வடகிழக்கு ஐரோப்பாவின் சில பகுதிகளில் மாறாக சராசரியை விட குறைந்த வெப்பநிலை ஏற்படலாம். ஸ்காண்டினேவியாவில் அதிக அழுத்தம் நிலவுவது, மேற்குக் காற்று பலவீனமாவது போன்ற காரணிகள் இதற்கு வழிவகுக்கலாம். மத்தியதரைக் கடல் பகுதியிலும் பிரான்சிலும் அதிக மழை பெய்யும் வாய்ப்பும் உள்ளது.
கனமழை மற்றும் காட்டுத்தீ அபாயம்
மத்தியதரைக் கடல் நீர் வழக்கத்தை விட வெப்பமாக இருப்பதால், இலையுதிர் காலத்தில் கனமழை ஏற்படலாம். இதனால் வெள்ளம் மற்றும் காட்டுத்தீ போன்ற தீவிர வானிலை நிகழ்வுகளின் அபாயம் உயரும்.
எனினும், அடுத்த குளிர்கால வானிலையை எல் நினோ மட்டும் தீர்மானிக்காது. வட அட்லாண்டிக் கடல் நிலை, பசிபிக் சூழல் மற்றும் பிற வானிலை காரணிகளும் முக்கிய பங்கு வகிக்கும். எனவே ஐரோப்பாவில் எல் நினோ தாக்கம் எந்த அளவில் இருக்கும் என்பதை துல்லியமாக கணிப்பது சிக்கலானதாக உள்ளது.
