இந்தத் திட்டத்தின் நோக்கம், சட்டபூர்வ உரிமையற்றவர்களை வெளியேற்றுவதுடன், ஐரோப்பாவை அடைவது அங்கு தங்குவதற்கான உத்தரவாதம் அல்ல என்ற செய்தியை மற்ற ஒழுங்கற்ற குடியேறிகளுக்கு தெரிவிப்பதாகும். தொடக்க கட்டத்தில், ஒவ்வொரு பங்கேற்கும் நாட்டிலிருந்தும் சுமார் 20 நிராகரிக்கப்பட்ட புகலிடக் கோரிக்கையாளர்களை Rwanda return centre-க்கு அனுப்புவது குறித்து பரிசீலிக்கப்படுகிறது.
ருவாண்டாவில் திட்டமிடப்படும் வரவேற்பு மையம்
இந்த மையம் மூடப்பட்ட தடுப்பு நிலையமாக இருக்காது எனத் தெரிவிக்கப்பட்டுள்ளது. ருவாண்டா இதனை “வரவேற்பு மையம்” என அழைக்க விரும்புகிறது. அங்கு தொழில்பயிற்சி மற்றும் திறன் மேம்பாட்டு வாய்ப்புகளுக்கான சில திட்டங்கள் வழங்கப்படலாம் என்றும் கூறப்படுகிறது.
ஐந்து நாடுகளின் பிரதிநிதிகள் செப்டம்பர் மாதம் கிகாலிக்கு சென்றனர். ருவாண்டா அதிகாரிகள் அண்மைய நாட்களில் பிரஸ்ஸல்ஸ் உள்ளிட்ட ஐரோப்பிய நகரங்களில் இதுகுறித்து பேச்சுவார்த்தை நடத்தினர். ருவாண்டாவுக்கும் இந்த ஐந்து நாடுகளுக்கும் இடையிலான சாத்தியமான ஒப்பந்தம், நவம்பர் நடுப்பகுதியில் வியன்னாவில் நடைபெறும் குடியேற்றம் தொடர்பான கூட்டத்தின் போது அறிவிக்கப்படலாம்.
அகதிகளின் உரிமைகள் மற்றும் சர்வதேசப் பொறுப்புகள் தொடர்பாக இந்தத் திட்டம் தீவிரமான கேள்விகளை எழுப்பும் என உரிமை அமைப்புகளும் சில அரசியல்வாதிகளும் விமர்சித்துள்ளனர். நெதர்லாந்தின் பசுமைக் கட்சி பிரதிநிதி அன்னா ஸ்ட்ரோலன்பெர்க், இந்த மையத்தை அமைப்பது “பெரிய தவறு” எனக் கூறியுள்ளார்.
பிரான்ஸ் அதிபர் இமானுவேல் மக்ரோனும் இதுபோன்ற மையங்களின் செயல்திறன் மற்றும் ஐரோப்பிய மதிப்புகளுடன் அவை ஒத்துப்போகுமா என்பது குறித்து முன்பு சந்தேகம் தெரிவித்திருந்தார். பிரிட்டன் 2022ஆம் ஆண்டு சில புகலிடக் கோரிக்கையாளர்களை ருவாண்டாவுக்கு அனுப்பும் திட்டத்தை முன்வைத்தது. ஆனால் சட்டரீதியான தடைகள் மற்றும் அரசியல் எதிர்ப்புகள் காரணமாக அது நடைமுறைக்கு வரவில்லை.
