அமேசான் நிறுவனர் ஜெஃப் பெசோஸின் விண்வெளி நிறுவனம் Blue Origin உருவாக்கிய New Glenn ராக்கெட் அமெரிக்காவின் புளோரிடாவில் நடைபெற்ற “ஹாட்-ஃபயர்” எனப்படும் தரைச் சோதனையின் போது தொழில்நுட்ப கோளாறு காரணமாக வெடித்ததாக நிறுவனம் தெரிவித்துள்ளது. ராக்கெட்டின் இயந்திரங்கள் தரையில் நிலைநிறுத்தப்பட்ட நிலையில் இயக்கப்படும் இந்தச் சோதனையின் போது திடீர் “anomaly” ஏற்பட்டதாக Blue Origin கூறியுள்ளது. சம்பவத்தில் பணியாளர்கள் அனைவரும் பாதுகாப்பாக இருப்பதாகவும் தெரிவிக்கப்பட்டது.

இந்த ராக்கெட் அமேசானின் செயற்கைக்கோள் இணையத் திட்டத்திற்காக 48 செயற்கைக்கோள்களை விண்ணில் செலுத்த தயாராக இருந்த நிலையில் இந்த விபத்து நடந்துள்ளது ஆனால் செயற்கைக்கோள்கள் அப்போது ராக்கெட்டில் பொருத்தப்படவில்லை என தகவல்கள் கூறுகின்றன. சமூக ஊடகங்களில் வெளியான காணொளிகளில் ராக்கெட் தீப்பந்தமாக வெடித்து பெரும் புகை மற்றும் தீச்சுவாலைகள் எழுந்த காட்சிகள் பதிவாகியுள்ளன. SpaceX நிறுவனத்துடன் போட்டியிட முயற்சிக்கும் Blue Origin நிறுவனத்திற்கு இது முக்கிய பின்னடைவாகக் கருதப்படுவதுடன் ராக்கெட்டின் எதிர்கால ஏவுதிட்டங்கள் மற்றும் நாசா தொடர்பான சந்திரன் திட்டங்களிலும் தாமதம் ஏற்படக்கூடும் என மதிப்பிடப்படுகிறது.