வாகனச் சோதனையில் தொடங்கிய துரத்தல்
கோவில்பாளையம் காவல் நிலைய தலைமை காவலர் வேல்முருகன், உதவி ஆய்வாளர் விக்னேஷ் உள்ளிட்ட போலீஸார் இன்று காலை வழக்கமான வாகனச் சோதனையில் ஈடுபட்டிருந்தனர். அப்போது கர்நாடகாவில் இருந்து வந்த சொகுசு காரை சந்தேகத்தின் பேரில் நிறுத்தினர். காரின் பின்புறத்தில் மூட்டைகள் இருந்ததால், அவற்றைச் சோதனையிட முயன்றபோது, ராஜஸ்தானைச் சேர்ந்த மூவர் போலீஸாரைத் தள்ளிவிட்டு காரை வேகமாக ஓட்டிச் சென்றதாகக் கூறப்படுகிறது.
இதையடுத்து தலைமை காவலர் வேல்முருகன் காரின் மேற்கூரையில் பாய்ந்து பிடித்துக் கொண்டார். ஆனால், அவரைப் பொருட்படுத்தாமல் கார் விளாங்குறிச்சி, காளப்பட்டி, சித்ரா வழியாக கணியூர் சுங்கச்சாவடியை நோக்கிச் சென்றது. ஃபாஸ்டேக் மூலம் கட்டணம் செலுத்திய பிறகும், கார் தடுப்புகளைத் தாண்டி தொடர்ந்து சென்றது.
300 கிலோ குட்கா மற்றும் புகையிலைப் பொருட்கள் பறிமுதல்
தகவலறிந்த கணியூர் மற்றும் அவிநாசி போலீஸார், ஆம்புலன்ஸ் ஓட்டுநர்களுடன் இணைந்து காரைத் துரத்தினர். அவிநாசி அன்னபூர்ணா ஹோட்டல் அருகே கார் சுற்றிவளைக்கப்பட்டது. முதலில் ஒருவர் பிடிபட்ட நிலையில், தப்பியோடிய இருவரும் தேடுதல் வேட்டையில் கைது செய்யப்பட்டனர்.
விசாரணையில் கைது செய்யப்பட்டவர்கள் பாபு தாரா, ராஜேஷ், சுரேஷ் என்பது தெரியவந்தது. பெங்களூருவில் இருந்து சுமார் 300 கிலோ தடைசெய்யப்பட்ட குட்கா மற்றும் புகையிலைப் பொருட்களை அவர்கள் காரில் கடத்தி வந்ததாக போலீஸார் தெரிவித்தனர். இந்த Coimbatore gutka smuggling சம்பவத்தின் காட்சிகளை வாகன ஓட்டிகள் பதிவு செய்த நிலையில், அவை சமூக வலைதளங்களில் பரவி வருகின்றன.
