பெற்றோரின் நடத்தையால் மாணவருக்கு பள்ளி மாற்றம் பிரான்சில் புதிய நடைமுறை

ஜூலை 28ஆம் திகதிய Décret n° 2026-687 அடிப்படையில் இந்த நடைமுறை கொண்டுவரப்பட்டுள்ளது. இந்த ஆணை ஜூலை 29ஆம் திகதி Journal officiel ல் வெளியிடப்பட்டது. இது மழலையர் பள்ளி ஆரம்பப் பள்ளி collège மற்றும் lycée ஆகியவற்றிற்குப் பொருந்தும்.

மாணவரின் கல்வியுடன் தொடர்புடைய சூழலில் அவரது குடும்ப உறுப்பினர் ஒருவரின் நடத்தை ஆசிரியர் அல்லது கல்விச் சமூகத்தைச் சேர்ந்த ஒருவரின் பாதுகாப்பு அல்லது உடல்நலத்திற்கு தெளிவான ஆபத்தை ஏற்படுத்தினாலோ அல்லது பாடசாலை நடவடிக்கைகள் மற்றும் வழக்கமான செயல்பாடுகளை கடுமையாக பாதித்தாலோ இந்த நடைமுறை பயன்படுத்தப்படலாம்.

இவ்வாறான சம்பவம் ஏற்பட்டால் பள்ளி இயக்குநர் collège principal அல்லது lycée proviseur ஆகியோர் சம்பந்தப்பட்ட département ன் கல்விச் சேவைகளுக்கான கல்வி இயக்குநரான DASEN ஐ அணுக முடியும். DASEN முதலில் மாணவரின் பெற்றோருடன் கலந்துரையாட வேண்டும்.

மழலையர் அல்லது ஆரம்பப் பள்ளி மாணவர் தொடர்பான விவகாரம் என்றால் பெற்றோருடன் பேசிய பின்னர் மாணவரை தற்போதைய பள்ளியிலிருந்து மாற்றி மற்றொரு பள்ளியில் சேர்க்குமாறு நகர மேயரிடம் DASEN கோரலாம்.

அந்த commune ல் ஒரே ஒரு அரசுப் பள்ளி மட்டுமே இருந்தால் வேறு commune ன் மேயர் மாணவரை தனது பகுதியில் உள்ள பள்ளியில் சேர்க்க ஒப்புக்கொண்டால் மட்டுமே மாற்றம் சாத்தியமாகும்.

Collège அல்லது lycée மாணவர் தொடர்பான விவகாரங்களில் பெற்றோருடன் கலந்துரையாடிய பின்னர் DASEN நேரடியாக அந்த மாணவரை வேறு கல்வி நிலையத்திற்கு மாற்றி நியமிக்க முடியும்.

மேலும் இறுதி முடிவு எடுக்கப்படும் வரை சம்பந்தப்பட்ட மாணவர் மற்றும்/அல்லது குடும்ப உறுப்பினர் பள்ளிக்குள் நுழைவதை தற்காலிகமாகத் தடை செய்ய பள்ளி நிர்வாகத்திற்கு அதிகாரம் வழங்கப்பட்டுள்ளது. ஆனால் இந்தத் தடை அதிகபட்சம் 5 நாட்களுக்கு மட்டுமே இருக்க முடியும்.

பள்ளி மாற்றப்படும் மாணவருக்கு புதிய கல்வி நிலையத்தில் நடப்பு கல்வியாண்டு முடியும் வரை கூடுதல் கல்வி சமூக மற்றும் வழிகாட்டல் கண்காணிப்பு வழங்கப்பட வேண்டும் என்றும் புதிய நடைமுறை குறிப்பிடுகிறது.

முக்கியமாக இது பெற்றோரின் சாதாரண புகார் அல்லது பள்ளியுடன் ஏற்படும் சிறிய கருத்து வேறுபாடு காரணமாக மாணவரை உடனடியாக மாற்றும் விதி அல்ல. குடும்ப உறுப்பினரின் நடத்தை பாதுகாப்பு அல்லது உடல்நலத்திற்கு குறிப்பிடத்தக்க ஆபத்தை ஏற்படுத்துவது அல்லது பள்ளியின் இயல்பான செயல்பாட்டை கடுமையாக பாதிப்பது போன்ற சூழ்நிலைகளுக்கான நடைமுறையாகும்.