இந்த முன்மொழிவு நடைமுறைக்கு வந்தால், எச்-1பி விசா வைத்திருப்பவர்களின் தகுதியான துணைவர்கள் தற்போது பயன்படுத்தும் வேலை அனுமதி மாற்றப்படும். பத்தாண்டுகளுக்கும் மேலாக நடைமுறையில் உள்ள விதி இதன் மூலம் திரும்பப் பெறப்படும்.
இந்தியர்கள் மீது தாக்கம் அதிகமாக இருக்கலாம். 2014 முதல் 2017 வரையிலான எச்-4 வேலை அனுமதி விண்ணப்பத் தரவின்படி, ஒப்புதல் பெற்றவர்களில் 93 சதவீதம் பேர் இந்தியர்கள். அவர்களில் 94 சதவீதம் பேர் பெண்கள்.
எச்-4 வேலை அனுமதி நீக்கத்துக்கு இன்னும் இறுதி முடிவு இல்லை
இந்தத் திட்டம், எச்-4 சார்பு துணைவர்களை வேலை அனுமதி கோரத் தகுதியுள்ளவர்களின் பட்டியலில் இருந்து நீக்குவதை நோக்கமாகக் கொண்டுள்ளது. இது அமெரிக்க உள்நாட்டுப் பாதுகாப்புத் துறையின் நீண்டகால ஒழுங்குமுறைத் திட்டத்தில் சேர்க்கப்பட்டுள்ளது. ஆனால் வெளியீட்டு தேதி குறிப்பிடப்படவில்லை.
இது தற்போது ஒரு முன்மொழிவு மட்டுமே. இறுதி விதியாக மாறுவதற்கு முன், அரசு மத்திய பதிவேட்டில் அதிகாரப்பூர்வ அறிவிப்பை வெளியிட வேண்டும். பொதுமக்கள் கருத்து தெரிவிக்கும் காலமும் வழங்கப்பட வேண்டும். அதன் பின்னரே இறுதி விதி வெளியிடப்படும்.
அதுவரை செல்லுபடியாகும் EAD வைத்திருக்கும் எச்-4 துணைவர்கள் தற்போதைய விதிகளின்படி தொடர்ந்து பணியாற்றலாம். எச்-4 விசா தனியாக வேலை செய்யும் விசா அல்ல. அமெரிக்காவில் எச்-1பி குடும்பத்துடன் வசிக்க இந்த விசா வழங்கப்படுகிறது.
வேலை செய்ய தனி வேலை அனுமதி ஆவணம் தேவை. எச்-1பி வைத்திருப்பவர் நிரந்தர குடியுரிமை பெறும் நடைமுறையில் இருப்பது போன்ற குறிப்பிட்ட நிபந்தனைகளில் மட்டுமே அந்த அனுமதி கிடைக்கும்.
இதுபோன்ற முயற்சி ஏற்கனவே ஒருமுறை நடந்துள்ளது. 2017ஆம் ஆண்டு முன்மொழியப்பட்ட திட்டம் இறுதி செய்யப்படவில்லை. அது 2021ஆம் ஆண்டு திரும்பப் பெறப்பட்டது.
எச்-1பி தொடர்பாக மேலும் சில நடவடிக்கைகளும் முன்மொழியப்பட்டுள்ளன. புதிய எச்-1பி பணியமர்த்தல்களுக்கு 103,265 அமெரிக்க டொலர் கட்டணம் விதிக்கும் திட்டமும், வேலை இழந்தவர்களுக்கு புதிய நிறுவனத்தைத் தேட வழங்கப்படும் 60 நாள் அவகாசத்தை நீக்கும் திட்டமும் இதில் அடங்கும்.
