தூத்துக்குடி மாவட்டம் ஆறுமுகமங்கலத்தைச் சேர்ந்த மென்பொறியாளர் கவின் செல்வகணேஷ், நெல்லையைச் சேர்ந்த வேறு சமூகத்தைச் சேர்ந்த பெண்ணைக் காதலித்ததாகக் கூறப்படும் நிலையில், 2025 ஜூலை 27 அன்று வெட்டிக் கொலை செய்யப்பட்டார். இந்த வழக்கில் அந்தப் பெண்ணின் சகோதரர் சுர்ஜித் கைது செய்யப்பட்டார். அவரது பெற்றோரான காவல் சார்பு ஆய்வாளர்கள் சரவணன், கிருஷ்ணகுமாரி மற்றும் உறவினர் ஜெயபால் ஆகியோரும் கைது செய்யப்பட்டனர்.
பெற்றோர் நீதி கோரி போராட்டம்
நெல்லை மாவட்ட சி.பி.சி.ஐ.டி. போலீஸார் தாக்கல் செய்த குற்றப்பத்திரிகையை ரத்து செய்யக் கோரி சரவணன், கிருஷ்ணகுமாரி, ஜெயபால் ஆகியோர் உயர் நீதிமன்ற மதுரைக் கிளையில் மனுத் தாக்கல் செய்திருந்தனர். நீதிபதி விஜயகுமார் பிறப்பித்த உத்தரவில், சரவணன் மற்றும் கிருஷ்ணகுமாரி மீதான வழக்கு ரத்து செய்யப்பட்டது. அதே நேரத்தில், கவினை எச்சரித்ததாகவும், கொலைக்குப் பிந்தைய சில நடவடிக்கைகளில் தொடர்பு இருந்ததாகவும் கூறப்பட்ட ஜெயபால் மீதான வழக்கை ரத்து செய்ய நீதிமன்றம் மறுத்தது.
இந்தத் தீர்ப்பு விசாரணையில் தாக்கம் ஏற்படுத்தக்கூடும் என்றும், தமிழ்நாடு அரசு உச்ச நீதிமன்றத்தில் மேல்முறையீடு செய்ய வேண்டும் என்றும் விடுதலைச் சிறுத்தைகள் கட்சித் தலைவர் திருமாவளவன் மற்றும் மனித உரிமைச் செயற்பாட்டாளர் எவிடென்ஸ் கதிர் தெரிவித்துள்ளனர்.
கவினின் தந்தை சந்திரசேகர், தாய் தமிழ்ச்செல்வி ஆகியோர் வீட்டின் முன்பு கவினின் புகைப்படத்தை வைத்து போராட்டம் நடத்தி வருகின்றனர். மேலும் விசாரணை நடத்தி உண்மையை வெளிக்கொண்டு வந்து நீதி வழங்க வேண்டும் என்றும், இனி இதுபோன்ற சம்பவத்தில் மற்றொரு கவின் உயிரிழக்கக் கூடாது என்றும் அவர்கள் வலியுறுத்தினர். Kavin Selva Ganesh murder case-ல் நீதி கிடைக்கும் வரை போராட்டம் தொடரும் எனவும் பெற்றோர் தெரிவித்தனர்.
