இந்த முகவர், பொதுமக்களுக்கு கிடைக்கும் மருந்துச் செலவுத் தகவல்கள் குறித்து ஆய்வு செய்யும் பணிக்காக பயன்படுத்தப்பட்டது. அது இணையத்தில் தகவல்களைத் தேடியபோது, Services Australia நிர்வகிக்கும் Medicare statistics reporting service இணையதளத்தை அணுகியது. இந்த சம்பவம் ஜூன் 18ஆம் தேதி நடந்ததாக பிரதமர் அந்தோனி அல்பனீஸ் தெரிவித்துள்ளார்.
அணுகப்பட்ட தகவல்களின் தன்மை
இணையதளத்தில் bulk billing புள்ளிவிவரங்கள், தடுப்பூசி தகவல்கள், Pharmaceutical Benefits Scheme புள்ளிவிவரங்கள், உறுப்பு தானப் பதிவுத் தகவல்கள் மற்றும் ஆண்டு அறிக்கைகள் இருந்தன. இவை தனிநபர்களை அடையாளம் காணாத ஒருங்கிணைக்கப்பட்ட தரவுகளாகும். சில தகவல்கள் சம்பவம் நடந்தபோது பொதுவில் வெளியிடப்படாதவையாக இருந்தாலும், அவை அதிக உணர்வுபூர்வமானவை அல்ல என்றும் பின்னர் வெளியிடப்பட்டுவிட்டதாகவும் அரசு கூறியுள்ளது.
இந்த சம்பவம் குறித்து OpenAI செப்டம்பர் 10ஆம் தேதி Services Australia-வின் திறந்த மின்னஞ்சல் பெட்டிக்கு தகவல் அனுப்பியது. Services Australia செப்டம்பர் 11ஆம் தேதி அதை கவனித்து, செப்டம்பர் 15ஆம் தேதி Australian Signals Directorate-க்கு அறிவித்தது. இதனால், சம்பவம் நடந்த பல மாதங்களுக்குப் பிறகே அரசு அறிந்தது குறித்து கேள்விகள் எழுந்துள்ளன.
Australian Institute of Health and Welfare, Victorian Health Department, NSW Bureau of Crime Statistics and Research ஆகிய அமைப்புகளின் இணையதளங்களும் பாதிக்கப்பட்டிருக்கலாம் என தெரிவிக்கப்பட்டுள்ளது. OpenAI, தங்களது மாதிரிகள் எதிர்பாராத நடவடிக்கைகளை மேற்கொண்டதாகவும், நோயாளி பதிவுகள் அணுகப்பட்டதற்கான ஆதாரம் இல்லை என்றும் கூறியுள்ளது.
சம்பவத்தை ஆய்வு செய்ய பிரதமர் மற்றும் அமைச்சரவைத் துறையின் தலைமையில் அரசு பணிக்குழுவை அமைத்துள்ளது. Australian Signals Directorate, AI Safety Institute மற்றும் Office of AI ஆகியவையும் இதில் இடம்பெறுகின்றன. Medicare AI hack சம்பவம் எதிர்காலத்தில் செயற்கை நுண்ணறிவு வழியாக ஏற்படக்கூடிய பெரிய இணையத் தாக்குதல்களுக்கு எச்சரிக்கையாக இருக்கலாம் என அரசு கருதுகிறது.
