UK Export Finance மற்றும் British Business Bank இணைந்து சிறு மற்றும் நடுத்தர ஏற்றுமதி நிறுவனங்களுக்கு புதிய நிதி உதவி திட்டத்தை அறிமுகப்படுத்தவுள்ளதாக பிரிட்டன் அரசு அறிவித்துள்ளது.

பிரிட்டன் அரசின் தகவலின்படி Chancellor ரேச்சல் ரீவ்ஸ் இந்த புதிய திட்டத்தை அறிவித்துள்ளார். 2027 ஆம் ஆண்டு வசந்த காலத்தில் (Spring 2027) தொடங்கவுள்ள இந்த திட்டம் வெளிநாடுகளுக்கு பொருட்கள் மற்றும் சேவைகளை ஏற்றுமதி செய்ய விரும்பும் ஆயிரக்கணக்கான சிறு மற்றும் நடுத்தர நிறுவனங்களுக்கு (SMEs) தேவையான நிதியை எளிதாகப் பெற உதவுவதை நோக்கமாகக் கொண்டுள்ளது.

தற்போது பல சிறிய நிறுவனங்கள் போதுமான சொத்து உத்தரவாதம் அல்லது வங்கி நிபந்தனைகள் காரணமாக ஏற்றுமதி வளர்ச்சிக்குத் தேவையான கடன்களைப் பெற முடியாமல் உள்ளன. இந்த சிக்கலைக் குறைக்கும் வகையில் UK Export Finance மற்றும் British Business Bank இணைந்து புதிய அரசு ஆதரவு நிதி அமைப்பை உருவாக்க உள்ளன.

இந்த நடவடிக்கை பிரிட்டனின் சிறு தொழில்கள் உலக சந்தையில் போட்டியிடும் திறனை உயர்த்துவதோடு புதிய வேலைவாய்ப்புகள் மற்றும் பொருளாதார வளர்ச்சிக்கும் ஆதரவாக இருக்கும் என அரசு தெரிவித்துள்ளது. அண்மையில் கடந்த ஒரு ஆண்டில் £11 பில்லியனுக்கும் அதிகமான ஏற்றுமதி நிதி ஆதரவை வழங்கி சுமார் 85,000 வேலைவாய்ப்புகளை ஆதரித்ததாகவும் அரசு வெளியிட்டுள்ளது.

புதிய திட்டத்திற்கான முழுமையான தகுதி விதிமுறைகள், விண்ணப்ப நடைமுறை மற்றும் பங்கேற்கும் நிதி நிறுவனங்கள் தொடர்பான மேலதிக தகவல்கள், திட்டம் தொடங்கும் முன்னர் வெளியிடப்படும் என தெரிவிக்கப்பட்டுள்ளது.