மொன்டானா தேசிய காவல் படையின் வீரர்கள் மற்றும் விமானப்படை வீரர்கள், இலங்கை ஆயுதப்படை உறுப்பினர்களுடன் இணைந்து இதில் பங்கேற்கின்றனர். அமெரிக்க பசிபிக் விமானப்படை மற்றும் பிற அமெரிக்க இராணுவப் பணியாளர்களும் பயிற்சியில் கலந்துகொள்கின்றனர். கட்டுநாயக்க மற்றும் கண்டி பகுதிகளில் செப்டம்பர் 4ஆம் தேதி வரை பயிற்சிகளும் நிபுணர் கருத்துப் பரிமாற்றங்களும் நடைபெறும்.
அட்லஸ் ஏஞ்சல் II பயிற்சியின் முக்கிய அம்சங்கள்
தொடக்க நிகழ்வில் மொன்டானா விமான தேசிய காவல் படைத் தளபதி பிரிகேடியர் ஜெனரல் ட்ரேஸ் தாமஸ் மற்றும் மொன்டானா தேசிய காவல் படையின் இராணுவ உதவி அட்ஜூட்டன்ட் ஜெனரல் பிரிகேடியர் ஜெனரல் ரெனியா டோர்வால் உள்ளிட்ட மூத்த அதிகாரிகள் பங்கேற்றனர்.
மொன்டானா மற்றும் இலங்கை இடையிலான உறவு கடந்த ஐந்து ஆண்டுகளில் வலுப்பெற்றுள்ளதாக தாமஸ் தெரிவித்தார். கடல், தரை மற்றும் விமானத் துறைகளில் இரு தரப்பினரும் தொடர்ந்து பயிற்சிகள் மற்றும் கலந்துரையாடல்களை நடத்தி வருகின்றனர். இந்த ஒத்துழைப்பு, பேரிடர் நடவடிக்கைகள் மற்றும் இராணுவ திறன்கள் தொடர்பான அனுபவப் பகிர்வை விரிவுபடுத்தியுள்ளது.
2024ஆம் ஆண்டு நடைபெற்ற முதல் அட்லஸ் ஏஞ்சல் பயிற்சியில், மொன்டானா இரண்டு சி-130 விமானங்களை இலங்கைக்கு அனுப்பியது. இலங்கை விமானப்படை, இராணுவம் மற்றும் கடற்படையுடன் இணைந்து பேரிடர் நடவடிக்கைப் பயிற்சி நடத்தப்பட்டது.
இந்த ஆண்டு பயிற்சியில் சி-130 விமானப் பராமரிப்பு, நகர்ப்புற தேடல் மற்றும் மீட்பு, மருத்துவ அவசர உதவி, சம்பவ கட்டளை அமைப்பு, கட்டுமானப் பொறியியல், மண்சரிவு நடவடிக்கை ஆகியவை இடம்பெறுகின்றன. இரசாயன, உயிரியல், கதிர்வீச்சு, அணுக்கரு மற்றும் வெடிபொருள் அவசரநிலைகளுக்கான நடவடிக்கைகளும் பயிற்றுவிக்கப்படுகின்றன.
விமானப் பயிற்சிகளில் தேடல் மற்றும் மீட்பு, காயமடைந்தவர்களை வெளியேற்றுதல் மற்றும் இயற்கைப் பேரிடர்களின்போது ஒருங்கிணைப்பு ஆகியவை அடங்கும். மொன்டானா வீரர்கள் காட்டுத்தீ, வெள்ளம் மற்றும் கடுமையான வானிலை போன்ற அவசரநிலைகளை எதிர்கொண்ட அனுபவங்களைப் பகிர்கின்றனர். அதேவேளை, இலங்கைப் பணியாளர்களின் பேரிடர் நடவடிக்கை அனுபவங்களையும் கற்றுக்கொள்கின்றனர்.
அட்லஸ் ஏஞ்சல் II பயிற்சி, இரு தரப்பினரின் தயார் நிலை, செயல்திறன் மற்றும் பரஸ்பர நம்பிக்கையை மேம்படுத்தும் என அதிகாரிகள் தெரிவித்தனர். எதிர்காலத்தில் அட்லஸ் ஏஞ்சல் III பயிற்சிக்கான திட்டமிடலைத் தொடங்க வேண்டும் என்றும் தாமஸ் வலியுறுத்தினார்.
