இங்கிலாந்தின் இரண்டாம் நிலை கால்பந்து தொடரான சாம்பியன்ஷிப் போட்டி, செப்டம்பர் 5ஆம் தேதி சனிக்கிழமை நடைபெற்றது. போர்ட்ஸ்மவுத் அணி கார்டிஃப் சிட்டியை 2-0 என்ற கோல் கணக்கில் வென்றது. இது தொடரின் ஐந்தாவது சுற்றுப் போட்டியாகும்.
கார்டிஃப் வீரர் ரசிகரை தாக்கிய சம்பவம் எப்படி நடந்தது?
போட்டியின் 72ஆவது நிமிடத்தில் இந்தச் சம்பவம் நடந்ததாக கூறப்படுகிறது. கார்டிஃப் அணியின் போலந்து நாட்டைச் சேர்ந்த பாதுகாப்பு வீரர் கிரிஸ்டியன் பிலிக், முன்வரிசையில் அமர்ந்திருந்த இளம் ரசிகரிடம் பந்தை தருமாறு கேட்டுள்ளார். அந்த ரசிகர் பந்தை வீரரிடமிருந்து தள்ளிவிட்டதாக தெரிவிக்கப்பட்டுள்ளது.
இதையடுத்து பிலிக் அந்த இளம் ரசிகரின் கழுத்தைப் பிடித்ததாக கூறப்படுகிறது. பதிலுக்கு ரசிகர் கால்பந்து வீரரின் முகத்தில் அடித்துள்ளார். பின்னர் இருவருக்கும் இடையே கைகலப்பு ஏற்பட்டது. அருகிலிருந்தவர்கள் தலையிட்டு இருவரையும் பிரித்தனர்.
சம்பவத்துக்குப் பிறகு அந்த ரசிகரும் அவரது குடும்பத்தினரும் பாதுகாப்பு ஊழியர்களின் கண்காணிப்பில் மைதானத்தை விட்டு வெளியேறினர். சமூக ஊடகங்களில் பகிரப்பட்ட காட்சிகள் குறித்து அதிகாரிகள் ஆய்வு செய்து வருகின்றனர்.
காவல்துறை மற்றும் கிளப் விசாரணை
ஹாம்ப்ஷயர் காவல்துறை, போட்டியின்போது இளம் வயது ரசிகர் ஒருவர் சாதாரண தாக்குதலுக்கு உள்ளானதாக கூறப்படும் சம்பவம் குறித்து விசாரிப்பதாக தெரிவித்துள்ளது. விசாரணை தொடர்ந்து நடைபெற்று வருவதாகவும் காவல்துறை குறிப்பிட்டுள்ளது.
போர்ட்ஸ்மவுத் கால்பந்து கிளப், இளம் ரசிகரும் எதிரணி வீரரும் தொடர்புடைய சம்பவம் குறித்து ஆதரவாளர்களின் கவலைகளை அறிந்துள்ளதாக கூறியுள்ளது. இது குழந்தைகள் பாதுகாப்பு தொடர்பான விவகாரம் என்பதால், கிளப்பும் காவல்துறையும் இணைந்து விசாரணை நடத்துகின்றன. விசாரணை முடியும் வரை சம்பவத்தின் சூழ்நிலைகள் குறித்து மேலதிகமாக கருத்து தெரிவிப்பது பொருத்தமற்றது என்றும் கிளப் தெரிவித்துள்ளது.
கார்டிஃப் வீரர் ரசிகரை தாக்கிய சம்பவம் தொடர்பான அடுத்தகட்ட நடவடிக்கை, விசாரணை முடிவுகள் மற்றும் கால்பந்து நிர்வாகத்தின் தீர்மானத்தைப் பொறுத்தே அமையும்.
