அழற்சி என்பது காயம் அல்லது தொற்றுக்கு உடலின் நோய் எதிர்ப்பு அமைப்பு அளிக்கும் பதில். தோலில் வெட்டு ஏற்பட்டால் அந்த பகுதி சிவந்து வீங்கும். அப்போது நோய் எதிர்ப்பு செல்கள் கிருமிகளை எதிர்த்து திசுக்களைச் சீரமைக்கச் செயற்படும்.
உடலில் சில நோய்கள் இருக்கும்போதும் அழற்சி ஏற்படலாம். உடல் பருமன் அல்லது வயது அதிகரிப்பு காரணமாக குறைந்த அளவிலான நீடித்த அழற்சியும் உருவாகலாம். இதற்கான ஒரு அடையாளமாக, இரத்தத்தில் சைட்டோகைன்கள் எனப்படும் மூலக்கூறுகளின் அளவு உயர்வது காணப்படலாம்.
மனநலம் மற்றும் அழற்சி: ஆய்வுகள் கூறுவது என்ன?
சைட்டோகைன்கள் நோய் எதிர்ப்பு செல்கள் ஒன்றுடன் ஒன்று தொடர்புகொள்ள உதவும் மூலக்கூறுகள். உடலில் நூற்றுக்கும் மேற்பட்ட சைட்டோகைன் வகைகள் உள்ளன. அவற்றில் சில மூளையின் செயல்பாடுகளையும் மனநிலையையும் பாதிக்கக்கூடும். காய்ச்சல் ஏற்பட்டபோது உடல் பாதிப்புடன் மனநிலையும் மாறுவது இதற்கு ஓர் எடுத்துக்காட்டு.
முடக்கு வாதம் கொண்ட நோயாளிகளைப் பற்றிய ஆய்வுகளில், சைட்டோகைன்களைத் தடுக்கும் அழற்சி எதிர்ப்பு மருந்துகள் மனநிலையையும் மேம்படுத்தியுள்ளன. மூளைப் படங்கள், சைட்டோகைன்களைத் தடுப்பது மூளையின் செயல்பாட்டில் மாற்றத்தை ஏற்படுத்தக்கூடும் எனக் காட்டுகின்றன.
சுமார் 5,000 குழந்தைகளை உள்ளடக்கிய ஓர் ஆய்வில், ஒன்பது வயதில் இரத்தத்தில் சராசரியைவிட அதிகமான IL-6 சைட்டோகைன் இருந்தவர்களுக்கு, அப்போது மனச்சோர்வு அறிகுறிகள் இல்லாவிட்டாலும், 18 வயதில் மனச்சோர்வு ஏற்படும் வாய்ப்பு அதிகமாக இருந்தது.
மற்றொரு வயது வந்தோர் ஆய்வு, நோய் எதிர்ப்பு அமைப்புடன் தொடர்புடைய நோய் உருவாகும் முன், மனச்சோர்வு மற்றும் பதற்றம் உள்ளிட்ட மனநலக் கோளாறுகள் கண்டறியப்பட்டிருக்கலாம் எனக் காட்டியது. இது காரணம் மற்றும் விளைவு உறவை நிரூபிக்கவில்லை.
தற்போது மனநலம் மற்றும் அழற்சி தொடர்பை அடிப்படையாகக் கொண்டு யாருக்கு எந்த சிகிச்சை பயனளிக்கும் என்பதை விஞ்ஞானிகள் உறுதியாக அறியவில்லை. நோய் எதிர்ப்பு அமைப்பின் எந்தப் பகுதியை பாதுகாப்பாக குறிவைக்கலாம் என்பதும் தெளிவாகவில்லை. எனவே, மனநலப் பிரச்சினைகளுக்கு மருத்துவ நிபுணரின் ஆலோசனையுடன் சிகிச்சை பெறுவது அவசியம்.
