கைது அதிகாரம் மற்றும் தடுப்புக் காவல் குறித்த கேள்விகள்
ஒழுங்கமைக்கப்பட்ட குற்றக் குழுக்களுடன் தொடர்புடையதாகக் கருதப்படும் பச்சைக் குத்தல்கள் அல்லது ஆடைகளை அடிப்படையாகக் கொண்டு ஒருவரைக் கைது செய்யும் தருணத்தில், அந்த ஒற்றுமையை யார் தீர்மானிப்பார்கள் என சாலியா பீரிஸ் கேள்வி எழுப்பியுள்ளார். இத்தகைய முடிவுகள் விரிவான அதிகாரம் வழங்கப்படும் காவல்துறை அதிகாரிகளால் ஆரம்பத்தில் எடுக்கப்படலாம் எனவும் அவர் கூறியுள்ளார்.
துணை காவல்துறை மா அதிபர் அல்லது காவல்துறை மா அதிபரின் கோரிக்கையின் பேரில், சம்பந்தப்பட்ட அமைச்சின் செயலாளர் தடுப்புக் காவல் உத்தரவைப் பிறப்பிக்க முடியும் என்றும் அவர் குறிப்பிட்டுள்ளார். இதன் மூலம் நீதித்துறை அனுமதியின்றி இரண்டு மாதங்கள் வரை ஒருவரைத் தடுத்து வைக்கவும், பின்னர் ஒரு வருடம் வரை தடுப்பை நீட்டிக்கவும் முடியும் என அவர் தெரிவித்துள்ளார்.
மேலும், இந்தச் சட்டத்தின் கீழ் ஒருவர் நீதிமன்றத்தில் முன்னிலைப்படுத்தப்பட்டால், போதுமான ஆதாரங்கள் இல்லாவிட்டாலும் நீதவானுக்கு அவரை விளக்கமறியலில் வைப்பதைத் தவிர வேறு வழியிருக்காது என சாலியா பீரிஸ் கூறியுள்ளார். பிணை கோர உயர் நீதிமன்றத்தை அணுக வேண்டிய நிலை சாதாரண மக்களுக்கு கூடுதல் சிரமத்தை ஏற்படுத்தும் என்றும் அவர் தெரிவித்துள்ளார்.
காவல்துறையால் பதிவு செய்யப்படும் ஒப்புதல் வாக்குமூலங்களை நீதிமன்றத்தில் சாட்சியமாக ஏற்கும் ஏற்பாடு சித்திரவதை மற்றும் துஷ்பிரயோகத்தை ஊக்குவிக்கலாம் எனவும் அவர் எச்சரித்துள்ளார். பயங்கரவாதத் தடுப்புச் சட்டம், அவசரகால விதிமுறைகள் மற்றும் ICCPR சட்டம் கடந்த காலங்களில் தவறாகப் பயன்படுத்தப்பட்டதாகவும் அவர் சுட்டிக்காட்டியுள்ளார்.
மறுபுறம், பச்சைக் குத்தல், ஆடை மற்றும் கைச் சைகைகள் தொடர்பான பிரிவுகள் சிங்கப்பூர் ஒழுங்கமைக்கப்பட்ட குற்றச் சட்டத்தை முன்மாதிரியாகக் கொண்டவை என்றும், தனிநபர்களின் தோற்றத்தை குற்றமாக்குவது நோக்கமல்ல என்றும் நீதியமைச்சர் தெரிவித்துள்ளார். Prevention of Organised Crimes Bill அக்டோபர் 20ஆம் தேதி நாடாளுமன்றத்தில் முதலாவது வாசிப்புக்கு முன்வைக்கப்பட்டதுடன், அது இன்னும் சட்டமாகவில்லை.
