2028 ஒலிம்பிக் போட்டிக்கான இடைக்கால மையம்
நிரந்தர மையம் திறக்கப்படும் வரை, கொழும்பு டொரிங்டன் விளையாட்டு வளாகத்தில் இடைக்கால உயர் செயல்திறன் மையம் நிறுவப்படவுள்ளது. அங்குள்ள தற்போதைய பார்வையாளர் அரங்கக் கட்டமைப்பும் விளையாட்டு மருத்துவ நிறுவனமும் இதற்குப் பயன்படுத்தப்படும்.
2028ஆம் ஆண்டு லாஸ் ஏஞ்சல்ஸ் ஒலிம்பிக் போட்டிக்காகத் தேர்ந்தெடுக்கப்படும் முன்னணி வீரர்களைத் தயார்படுத்துவதே இந்த இடைக்கால மையத்தின் முதன்மை நோக்கமாகும். எதிர்காலத்தில் நடைபெறவுள்ள 2028, 2032 மற்றும் 2036 ஒலிம்பிக் போட்டிகளில் இலங்கையின் போட்டித் திறனை உயர்த்தும் வகையில் இந்தத் திட்டம் முன்னெடுக்கப்படுகிறது.
விளையாட்டுத் துறையின் மேம்பாட்டுக்காக அறிவியல் அடிப்படையிலான, கட்டமைக்கப்பட்ட உயர் செயல்திறன் அமைப்பு இலங்கையில் இல்லாததைச் சுட்டிக்காட்டிய நிபுணர் குழுவின் பரிந்துரைகளைத் தொடர்ந்து இந்த முடிவு எடுக்கப்பட்டுள்ளது.
தியகமவில் அமையவுள்ள நிரந்தர Sri Lanka high performance centre-ன் பிரதான கட்டுமானப் பணிகள் 2027ஆம் ஆண்டு தொடங்கி மூன்று ஆண்டுகளில் நிறைவடையும் என எதிர்பார்க்கப்படுகிறது.
