இங்கிலாந்தில் ஆண்களுக்கு மயக்க மருந்து கொடுத்து கொள்ளை இருவர் உயிரிழப்பு

31 வயதான Adina Mihai மற்றும் 30 வயதான Madalin Dumitru ஆகியோர் 2024 ஆகஸ்ட் முதல் 2025 ஜூலை வரையான காலப்பகுதியில் பாலியல் சேவைகளை நாடிய ஆண்களை திட்டமிட்டு குறிவைத்ததாக விசாரணையில் தெரியவந்துள்ளது.

பெண் பாலியல் தொழிலாளி போன்று தன்னை அடையாளப்படுத்திக்கொண்டு ஆண்களை அவர்களது வீடுகளில் சந்தித்துள்ளார். அங்கு அவர்களது பானங்களில் GBL என்ற பொருள் ரகசியமாக கலக்கப்பட்டதாக பொலிஸார் தெரிவித்துள்ளனர். இந்தப் பொருள் உடலுக்குள் சென்ற பின்னர் GHB ஆக மாறி மயக்கம் மற்றும் தூக்கத்தை ஏற்படுத்தக்கூடியது. பாதிக்கப்பட்டவர்கள் மயக்கமடைந்த பின்னர் அவர்களிடமிருந்து பணம் மற்றும் பொருட்களை திருடுவதே இவர்களின் நோக்கமாக இருந்ததாக விசாரணையில் கண்டறியப்பட்டுள்ளது.

இந்தச் சம்பவங்களில் இரண்டு ஆண்கள் உயிரிழந்துள்ளனர். Gloucestershire பகுதியைச் சேர்ந்த 80 வயதான Malcolm King 2024 ஆகஸ்ட் 21 அன்று தனது வீட்டில் உயிரிழந்த நிலையில் கண்டுபிடிக்கப்பட்டார். ஆரம்பத்தில் அவரது மரணம் ஏற்கனவே இருந்த உடல்நலப் பிரச்சினையுடன் தொடர்புடையதாக கருதப்பட்டது. பின்னர் மேற்கொள்ளப்பட்ட தடயவியல் விசாரணையில் அவரது மரணமும் இந்த சம்பவங்களுடன் தொடர்புடையது கண்டறியப்பட்டது.

அதேபோன்று Oxfordshire, Banbury பகுதியைச் சேர்ந்த 37 வயதான Gary Mouat, 2025 ஜூலை 13 அன்று தனது வீட்டில் உயிரிழந்த நிலையில் கண்டுபிடிக்கப்பட்டார். அவரது மதுபானத்தில் GBL கலக்கப்பட்டிருந்ததாக விசாரணையில் தெரியவந்தது.

இதனையடுத்து நாடு முழுவதும் உள்ள பொலிஸ் பிரிவுகளுக்கு தகவல் அனுப்பப்பட்டு இதேபோன்ற சந்தேகத்திற்கிடமான மரணங்கள் உள்ளனவா என்பது தொடர்பிலும் விசாரணை நடத்தப்பட்டது. மேலும் இரு ஆண்களும் இதே முறையில் மயக்கமருந்து கொடுக்கப்பட்டிருந்தபோதிலும் அவர்கள் உயிர் தப்பியதாக பொலிஸார் தெரிவித்துள்ளனர்.

Adina Mihai மற்றும் Madalin Dumitru ஆகியோர் Oxford Crown Court இல் இரண்டு ஆண்களின் மரணம் தொடர்பான ஆட்கொலை குற்றங்களையும் மேலும் இருவருக்கு நச்சுப் பொருள் வழங்கிய குற்றங்களையும் ஒப்புக்கொண்டுள்ளனர்.