பாதுகாப்பு
கசிந்த கடிதப் பரிமாற்றங்கள், பயணப் பதிவுகள் மற்றும் ராணுவக் காப்புரிமை ஆவணங்களை அடிப்படையாகக் கொண்ட விசாரணையில் இந்த விவரங்கள் தெரிவிக்கப்பட்டுள்ளன. ‘C430L’ என்ற குறியீட்டுப் பெயரில் இந்தப் பல ஆண்டுத் திட்டம் 2023ஆம் ஆண்டு தொடங்கியதாகக் கூறப்படுகிறது.
புதிய தலைமுறை ஏவுகணைகளுக்கான ராம்ஜெட் உந்துவிசை தொழில்நுட்பத்தை உருவாக்க, ரஷ்ய ஏவுகணை நிபுணர்கள் ஈரானுக்கு உதவியதாகத் தகவல்கள் தெரிவிக்கின்றன. ராம்ஜெட் உந்துவிசை மூலம் க்ரூஸ் ஏவுகணைகள் ஒலியின் வேகத்தைப் பல மடங்கு கடக்க முடியும்.
இந்தத் தொழில்நுட்பம் கப்பல் எதிர்ப்பு மற்றும் தரைத் தாக்குதல் ஏவுகணைகளில் பயன்படுத்தப்படுவதற்கான வாய்ப்பு அதிகம் என நிபுணர்கள் தெரிவித்துள்ளனர். ஈரான் ராம்ஜெட் உந்துவிசை அமைப்பை உருவாக்கி, பறப்புச் சோதனையும் நடத்தியதாகக் கூறப்படுகிறது. எனினும், ரஷ்யாவின் உதவியுடன் உருவாக்கப்பட்ட அதிவேக க்ரூஸ் ஏவுகணை இதுவரை செயல்பாட்டுக்கு வந்ததற்கான ஆதாரம் இல்லை.
இந்தத் திட்டத்தை ரஷ்ய அரசின் ஆயுத ஏற்றுமதி நிறுவனமான ரோஸோபோரோனெக்ஸ்போர்ட், ஏவுகணை தயாரிப்பு நிறுவனமான NPO மஷினோஸ்ட்ரோயேனியாவுடன் இணைந்து ஒருங்கிணைத்ததாகத் தெரிவிக்கப்பட்டுள்ளது. ஈரானின் பறப்புச் சோதனைத் தரவுகளை ரஷ்ய பொறியாளர்கள் ஆய்வு செய்து, எரிபொருள் அமைப்புகள், எரிப்பு நிலைத்தன்மை, காற்று நுழைவாயில்கள் மற்றும் இயந்திர முனைகள் குறித்து தொழில்நுட்ப வழிகாட்டுதலை வழங்கியதாகக் கூறப்படுகிறது.
அமெரிக்கா-இஸ்ரேல் போர் ஈரானுடன் தொடங்கிய பின்னரும் இந்த ஒத்துழைப்பு 2026ஆம் ஆண்டு வரை தொடர்ந்ததாகத் தகவல்கள் தெரிவிக்கின்றன. திட்டத்தின் அடுத்த கட்டம் குறித்து ஜூன் மாதம் வரை இரு தரப்பும் பேச்சுவார்த்தை நடத்தியதாகக் கூறப்படுகிறது.
