செயற்கை நுண்ணறிவு பயிற்சிக்கும் நிறுவனங்களுக்கும் ஆதரவு
பட்ஜெட் 2027 கீழ், AI Malaysia நிறுவனத்தை வலுப்படுத்தி உயர் திறன் கொண்ட மனிதவளம், டிஜிட்டல் உள்கட்டமைப்பு மற்றும் பாதுகாப்பான, நெறிமுறை சார்ந்த செயற்கை நுண்ணறிவு நிர்வாகம் ஆகியவற்றில் கவனம் செலுத்தப்பட உள்ளது. மேலும், 5,000 செயற்கை நுண்ணறிவு நிபுணர்களுக்கு பயிற்சியும் சான்றிதழும் வழங்கப்படும்.
மலேசிய டிஜிட்டல் பொருளாதாரக் கழகத்தின் நிதி மூலம் 4,000 குறு, சிறு மற்றும் நடுத்தர நிறுவனங்கள் செயற்கை நுண்ணறிவு தொழில்நுட்பத்தைப் பயன்படுத்தவும், தங்கள் செயல்பாடுகளை தானியக்கப்படுத்தவும் உதவி பெறும். ஏற்கனவே அதிகபட்ச இரண்டாண்டு காலத்தை நிறைவு செய்துள்ள DE Rantau Nomad Pass வைத்திருப்பவர்களுக்கு மேலும் இரண்டு ஆண்டுகள் நீட்டிப்பு வழங்கப்படும்.
நாடு முழுவதும் உள்ள 300க்கும் மேற்பட்ட பொண்டோக் பள்ளிகளில் ஆசிரியர்கள் மற்றும் மாணவர்களுக்கு சாதனங்களும் டிஜிட்டல் திறன் பயிற்சியும் வழங்கப்பட உள்ளன. பொதுமக்களின் அணுகலை விரிவுபடுத்த, ChatGPT உள்ளிட்ட பிரபலமான AI செயலிகளுக்கான கூடுதல் 1 லட்சம் இலவச சந்தாக்களும் வழங்கப்படும்.
Digital Rakyat தளம் மூலம் Coursera உடன் இணைந்து 16,000க்கும் மேற்பட்ட டிஜிட்டல் பாடநெறிகள் மற்றும் தொழில்முறை சான்றிதழ்களுக்கு மலேசியர்களுக்கு இலவச அணுகல் வழங்கப்படுகிறது. இந்த நடவடிக்கைகள் Malaysia AI Nation 2030 இலக்கை நோக்கிய டிஜிட்டல் மாற்றத்தை வேகப்படுத்தும் என அமைச்சகம் தெரிவித்துள்ளது.
பட்ஜெட் 2027ல் அரசின் ஒதுக்கீடு 459.8 பில்லியன் மலேசிய ரிங்கிட்டாகும். அரசு தொடர்புடைய முதலீட்டு நிறுவனங்கள், பொது-தனியார் முதலீடுகள் மற்றும் சட்டப்பூர்வ அமைப்புகளின் பங்களிப்புகளுடன் மொத்த முதலீடு 510 பில்லியன் ரிங்கிட்டாகிறது.
