கொச்சியைச் சேர்ந்த சி.எம்.ஆர்.எல் நிறுவனத்துக்கும், வீணாவுக்குச் சொந்தமான எக்சாலாஜிக் சொல்யூஷன்ஸ் நிறுவனத்துக்கும் இடையே முறைகேடான பணப் பரிவர்த்தனைகள் நடந்ததாகப் புகார் எழுந்தது. இதுகுறித்து விசாரணை நடத்தக் கோரி அமலாக்கத்துறை கேரள டிஜிபிக்கு கடிதம் அனுப்பியிருந்தது. பின்னர், அந்தக் கடிதத்தின் அடிப்படையில் நேரடியாக எஃப்.ஐ.ஆர் பதிவு செய்ய உத்தரவிடக் கோரி கேரள உயர் நீதிமன்றத்தில் மனு தாக்கல் செய்யப்பட்டது. காவல்துறை நேரடியாக வழக்குப்பதிவு செய்யலாம் என்று நீதிமன்றம் உத்தரவிட்டதைத் தொடர்ந்து இந்த நடவடிக்கை எடுக்கப்பட்டுள்ளது.
எஃப்.ஐ.ஆரில் குறிப்பிடப்பட்ட குற்றச்சாட்டுகள்
வழக்கில் பினராயி விஜயன் முதல் குற்றவாளியாகவும், வீணா இரண்டாவது குற்றவாளியாகவும் சேர்க்கப்பட்டுள்ளனர். முன்னாள் அமைச்சரும் பினராயி விஜயனின் மருமகனுமான பி.ஏ. முகமது ரியாஸ் உள்ளிட்டோரின் பெயர்களும் வழக்கில் இடம்பெற்றுள்ளன. எக்சாலாஜிக் நிறுவனம், சி.எம்.ஆர்.எல் நிர்வாக இயக்குநர் எஸ்.என். சசிதரன் கர்த்தா, பி. சுரேஷ் குமார் மற்றும் எம்.பவர் இந்தியா கேப்பிட்டல் லிமிடெட் மீதும் ஊழல் தடுப்புச் சட்டத்தின் கீழ் வழக்குப்பதிவு செய்யப்பட்டுள்ளது.
வருமானத்திற்கு அதிகமாக சொத்து சேர்த்தல் மற்றும் சட்டவிரோத வெளிநாட்டு ஹவாலா பரிவர்த்தனை தொடர்பாக தனி எஃப்.ஐ.ஆரும் பதிவு செய்யப்பட்டுள்ளது. ரியாஸ், வீணா மற்றும் மேலும் சிலர் துபாய்க்கு ஹவாலா மூலம் பணம் மாற்றியதாக அதில் குற்றச்சாட்டு கூறப்பட்டுள்ளது. வீணாவின் வீட்டில் நடத்தப்பட்ட சோதனையில் கைப்பற்றப்பட்டதாகக் கூறப்படும் ‘ரெட் புக்’ குறிப்புகள் மற்றும் ‘நம்மள் பேப்பூர் கோர் டீம்’ என்ற வாட்ஸ்அப் குழு தொடர்பான தகவல்களும் விசாரணையில் இடம்பெற்றுள்ளன. Pinarayi Vijayan vigilance case அதிகார துஷ்பிரயோகம், கூட்டுச் சதி, மோசடி மற்றும் வருமானத்திற்கு அதிகமான சொத்துக் குவிப்பு உள்ளிட்ட குற்றச்சாட்டுகளின் கீழ் விசாரிக்கப்படுகிறது.
