சவுதி அரேபியாவின் அதிகாரப்பூர்வ தொழிலாளர் சேவை தளமான Qiwa வெளிநாட்டு தொழிலாளர்களின் Work Permit (வேலை அனுமதி) புதுப்பிப்பு தொடர்பாக புதிய விளக்கங்களை வெளியிட்டுள்ளது. Work Permit என்பது சவுதிக்கு வேலை விசாவில் வரும் வெளிநாட்டு ஊழியர்கள் சட்டபூர்வமாக வேலை செய்யவும் பின்னர் Iqama (குடியிருப்பு அட்டை) பெறவும் அவசியமான ஆவணமாகும்.

Qiwa வெளியிட்ட தகவலின்படி ஒரு ஊழியரின் Work Permit காலாவதியாகும் முன்பே அதனை புதுப்பிக்க வேண்டும். குறிப்பிட்ட காலக்கெடுவிற்குள் புதுப்பிக்கப்படாவிட்டால் அந்த ஊழியரின் பதிவு தானாகவே ரத்து செய்யப்படலாம். மேலும் ஊழியரின் நிதி மற்றும் சட்டப் பொறுப்புகள் தொடர்பாக நிறுவனமே பொறுப்பேற்க வேண்டிய சூழ்நிலை உருவாகலாம்.

மேலும் “Employee has a pending request to terminate a contractual relationship” என்ற அறிவிப்பு தோன்றினால் அந்த ஊழியரின் வேலை ஒப்பந்தத்தை முடிக்கும் கோரிக்கை நிலுவையில் உள்ளது என்பதைக் குறிக்கும். அந்த கோரிக்கை தீர்க்கப்படாத வரை Work Permit புதுப்பிக்க முடியாது என Qiwa தெளிவுபடுத்தியுள்ளது.

Qiwa விதிகளின்படி Work Permit-களை 3, 6, 9 அல்லது 12 மாதங்களுக்கு புதுப்பிக்க முடியும். கட்டணங்கள் நிறுவனத்தின் Saudization (Nitaqat) நிலையைப் பொறுத்து மாறுபடும். 12 மாத Work Permit புதுப்பிப்பிற்கான மொத்த கட்டணம் பொதுவாக SAR 8,500 முதல் SAR 9,700 வரை இருக்கலாம்.

அதேநேரத்தில் காலாவதியான Work Permit-களுக்கான நிலுவைத் தொகைகளை தவணை முறையில் செலுத்த அனுமதி இல்லை என்றும், முழுத் தொகையையும் ஒரே தடவையில் செலுத்த வேண்டும் என்றும் Qiwa தெரிவித்துள்ளது.