அமர்ஷிபாய் சும்ரா என்பவர் தங்காத் மற்றும் லக்மண்ச்சி இடையே இரவு நேரத்தில் சென்ற ஹபா-மும்பை ரயில் முன் பாய்ந்ததாக குடும்பத்தினர் தெரிவித்துள்ளனர். ரயில்வே காவல்துறையினர் சம்பவ இடத்துக்குச் சென்று விசாரணையைத் தொடங்கியுள்ளனர்.
தங்காத் துப்பாக்கிச்சூடு வழக்கு: 14 ஆண்டுகளாக நீடிக்கும் கேள்விகள்
2012ஆம் ஆண்டு செப்டம்பர் மாதம் தங்காத் நகரில் நடைபெற்ற தர்ணேதர் திருவிழாவின்போது தலித் மற்றும் பர்வாட் சமூகத்தினரிடையே மோதல் ஏற்பட்டது. அதனைத் தொடர்ந்து காவல்துறையினர் துப்பாக்கிச்சூடு நடத்தினர். இதில் மெஹுல் ரத்தோட், பங்கஜ் சும்ரா, பிரகாஷ் பர்மர் ஆகிய மூன்று தலித் இளைஞர்கள் உயிரிழந்தனர்.
அப்போது உயிரிழந்தவர்களில் பங்கஜ் சும்ராவுக்கு 16 வயது. அவர் அமர்ஷிபாய் சும்ராவின் மகன். சம்பவத்துக்குப் பிறகு காவல்துறையின் நடவடிக்கை குறித்து குஜராத் முழுவதும் பல கேள்விகள் எழுந்தன.
சம்பவத்தை விசாரிக்க மாநில அரசு சிறப்பு விசாரணைக் குழுவை அமைத்தது. அந்தக் குழு தங்காத் பகுதிக்குச் சென்று திருவிழா நடைபெற்ற இடம் மற்றும் ரயில்வே கேட்டை ஆய்வு செய்தது. துப்பாக்கிச்சூடு நடந்த இடத்தை உறுதி செய்ய அளவீடுகள் மேற்கொள்ளப்பட்டன. சம்பவ இடம் காணொளியாகவும் பதிவு செய்யப்பட்டது.
எனினும், 14 ஆண்டுகள் கடந்தும் விசாரணை அறிக்கை வெளியிடப்படவில்லை என்று உயிரிழந்த இளைஞர்களின் குடும்பத்தினர் கூறுகின்றனர். நீதி கிடைக்கவில்லை என்ற குற்றச்சாட்டும் தொடர்ந்து முன்வைக்கப்படுகிறது.
மகன் உயிரிழந்தது முதல் அமர்ஷிபாய் நீதி கோரி போராடி வந்ததாக குடும்பத்தினர் தெரிவித்துள்ளனர். ரக்ஷா பந்தன் நாளில், உயிரிழந்த சகோதரனை நினைத்து அவரது மகள்கள் துயரப்படுவதைப் பார்த்த அவர் மிகுந்த மனவேதனை அடைந்ததாக கூறப்படுகிறது. மூன்று இளைஞர்களுக்காக அமைக்கப்பட்ட நினைவிடத்துக்கு அருகிலேயே அவர் உயிரை மாய்த்துக் கொண்டதாக குடும்பத்தினர் தெரிவித்துள்ளனர்.
இந்தச் சம்பவம், தங்காத் துப்பாக்கிச்சூடு வழக்கு விசாரணை அறிக்கை எப்போது வெளியிடப்படும் என்பதையும், பாதிக்கப்பட்ட குடும்பங்களுக்கு நீதி எப்போது கிடைக்கும் என்பதையும் மீண்டும் கேள்விக்குள்ளாக்கியுள்ளது.
