செப்டம்பர் 28ஆம் தேதி லிவர்பூலில் நடைபெற்ற தொழிலாளர் கட்சியின் ஆண்டு மாநாட்டில் இந்த அறிவிப்பு வெளியானது. அரசின் குடியேற்றக் கொள்கையை மேலும் கடுமையாக்குவதற்கு கட்சிக்குள் சிலர் எதிர்ப்பு தெரிவித்து வரும் நிலையில் இந்த நடவடிக்கை அறிவிக்கப்பட்டுள்ளது.
ஆப்கான் பெண்கள் மற்றும் பாலஸ்தீனர்களுக்கு முன்னுரிமை
புதிய திட்டத்தின் கீழ் வருவோரில் சுமார் நான்கில் ஒரு பங்கினர் ஆப்கானிஸ்தானில் தலிபான் ஆட்சியின் துன்புறுத்தலிலிருந்து தப்பிய பெண்கள் மற்றும் சிறுமிகள் ஆவர். காசா பகுதியில் நிலவும் கடுமையான சூழ்நிலையிலிருந்து தப்பிய பாலஸ்தீனர்களும் இந்தத் திட்டத்தின் மூலம் வருவார்கள் என உள்துறை அமைச்சகம் தெரிவித்துள்ளது.
இந்தத் திட்டம் ஐக்கிய நாடுகள் சபையின் அகதிகளுக்கான உயர் ஆணையம் மற்றும் சர்வதேச அகதி உதவித் திட்டத்துடன் இணைந்து செயல்படுத்தப்படும். முதல் வருகைகள் ஓராண்டுக்குள் தொடங்கும் என எதிர்பார்க்கப்படுகிறது. பின்னர், சட்டவிரோத குடியேற்றம் குறையும் அளவுக்கு, ஆண்டுக்கு சில ஆயிரம் பேர் வரை அனுமதிக்கப்படுவர். எனினும் ஆண்டுதோறும் அனுமதிக்கப்படும் எண்ணிக்கைக்கு உச்சவரம்பு நிர்ணயிக்கப்படும்.
அகதிகளுக்கான விதிகள் கடுமையாக்கப்பட்டுள்ள சூழலில், UK refugee resettlement route திட்டம் தனியான பாதுகாப்பான குடியேற்ற வாய்ப்பாக அறிவிக்கப்பட்டுள்ளது. ஏப்ரல் 2025 முதல் மார்ச் 2026 வரை மூன்றாம் நாடுகளிலிருந்து 4,894 அகதிகளை பிரிட்டன் ஏற்றுக்கொண்டது. இது முந்தைய ஆண்டை விட 37 சதவீதம் குறைவாகும்; அவர்களில் 90 சதவீதம் பேர் ஆப்கானியர்கள்.
