ஆஸ்திரேலிய தலைநகர் பிராந்தியமான ACT-ல் தற்போது ஐந்து சட்டவிரோத மோட்டார் சைக்கிள் கும்பல்கள் செயல்படுகின்றன. அவற்றில் சுமார் 45 உறுப்பினர்களும் 20 கூட்டாளிகளும் இருப்பதாக காவல்துறை தெரிவித்துள்ளது. Rebels, Bandidos, Hells Angels, Finks மற்றும் Comancheros ஆகிய கும்பல்கள் ACT-ல் தங்களது பிரிவுகள் அல்லது தளங்களை அமைத்துள்ளன.
கும்பல்களின் செயல்பாடுகளைத் தடுக்க காவல்துறை முயற்சி
குற்றக் கும்பல் உறுப்பினர்கள் பொதுவெளியில் ஒன்றுகூடுவதைத் தடுக்கும் சட்டங்கள், அவர்களின் வெளிப்படையான தொடர்புகளையும் கூட்டங்களையும் பாதிக்கக்கூடும் என ஸ்காட் லீ கூறினார். இருப்பினும், இத்தகைய சட்டங்கள் முழுமையான தீர்வாக இருக்காது என்றும் அவர் எச்சரித்தார்.
ACT அரசுகள் இதுவரை இந்தச் சட்டங்களை எதிர்த்து வந்துள்ளன. மனித உரிமைகள் சட்டத்துடன் அவை முரண்படக்கூடும் என்பதே அதற்கான காரணம். நிபுணர் மார்க் லாக்ஸ், மனித உரிமை கவலைகள் இருப்பதை ஏற்றுக்கொண்டாலும், இலக்கு வைக்கப்பட்ட ACT anti-consorting laws தேவைப்படுவதாகக் கூறினார்.
இந்தக் கும்பல்கள் போதைப்பொருள், துப்பாக்கிகள், ஆயுதங்கள் மற்றும் மிரட்டல் நடவடிக்கைகளுடன் தொடர்புடையவை என காவல்துறை தெரிவித்துள்ளது. இந்த மாத தொடக்கத்தில், சுமார் 70 கிலோ கோகெய்னை கடத்தியதாகக் குற்றம்சாட்டப்பட்ட ACT கும்பல் உறுப்பினர்கள் கைது செய்யப்பட்டனர். அந்தப் போதைப்பொருளின் தெரு மதிப்பு சுமார் 10 மில்லியன் ஆஸ்திரேலிய டொலர்கள் என கூறப்பட்டுள்ளது.
கும்பல் உறுப்பினர்கள் தங்கள் அடையாள நிறங்கள் அல்லது சின்னங்களை அணிவதைத் தடைசெய்யும் முன்மொழிவும், வாரண்ட் இன்றி சட்டவிரோத துப்பாக்கிகளைத் தேட காவல்துறைக்கு கூடுதல் அதிகாரம் வழங்கும் முன்மொழிவும் இன்னும் ACT சட்டமன்றத்தில் விவாதிக்கப்படவில்லை.
