ஆசிய-பசிபிக் ஒலிபரப்பு ஒன்றியத்தின் 63ஆவது பொதுச் சபையில் ஞாயிற்றுக்கிழமை (1) உரையாற்றிய அவர், தொழில்நுட்ப வளர்ச்சியால் தகவல்களை அணுகுவது எளிதாகியுள்ள போதிலும், உண்மை மற்றும் பொய்யை வேறுபடுத்துவது கடினமாகி வருவதாகக் கூறினார். துல்லியமான தகவல்களை வழங்கி, பொதுமக்களின் புரிதலை மேம்படுத்தும் பொறுப்பு ஒலிபரப்பு நிறுவனங்களுக்கு இருப்பதாகவும் அவர் வலியுறுத்தினார்.
சமூகங்களுக்கு இடையிலான புரிதலை வளர்க்கும் ஊடகங்கள்
இலங்கையின் பல்வகை சமூக அமைப்பைச் சுட்டிக்காட்டிய அமைச்சர், உரையாடல், பரஸ்பர மரியாதை மற்றும் அமைதியான இணக்க வாழ்வை ஊக்குவிப்பதில் ஊடகங்கள் முக்கிய பங்கு வகிப்பதாகத் தெரிவித்தார். தொழில்நுட்பப் புதுமைகள் மனிதகுலத்துக்குச் சேவை செய்வதுடன், அறிவை அதிகமான மக்களிடம் கொண்டு செல்ல வேண்டும் என்றும் அவர் கூறினார்.
“அமைதியை இராஜதந்திரத்தால் மட்டும் நிலைநிறுத்த முடியாது” எனக் குறிப்பிட்ட விஜித ஹேரத், சமூகங்களுக்கு இடையிலான புரிதலின் அவசியத்தையும், மக்களை நெருக்கமாக்குவதில் பொறுப்பான ஒலிபரப்பின் பங்களிப்பையும் எடுத்துரைத்தார். Asia-Pacific Broadcasting Union Assembly நிகழ்வில் ஜனாதிபதி அநுர குமார திசாநாயக்க மற்றும் கொழும்பு மேயர் Vraîe Cally Balthazaar ஆகியோரும் கலந்துகொண்டனர்.
MTV Sri Lanka ஏற்பாட்டில் நடைபெறும் இந்த ஐந்து நாள் கூட்டங்கள், “Media for Peace and Humanity: Truth, Trust, and Transformation” என்ற கருப்பொருளில் ஒக்டோபர் 30 முதல் நவம்பர் 3 வரை நடைபெறுகின்றன. ஆசிய-பசிபிக் பிராந்தியத்திலும் அதற்கு அப்பாலும் உள்ள ஒலிபரப்பாளர்கள், ஊடக வல்லுநர்கள் மற்றும் தொழில்துறை தலைவர்கள் இதில் பங்கேற்கின்றனர்.
