டப்ளினில் உள்ள நிறுவனத் துறை, சுற்றுலா மற்றும் வேலைவாய்ப்புத் துறை வெளியிட்ட தகவலின்படி, சந்தேகத்திற்கிடமான செயல்பாடு கண்டறியப்பட்டதைத் தொடர்ந்து அக்டோபர் 29ஆம் தேதி இந்தத் தளம் முன்னெச்சரிக்கையாக முடக்கப்பட்டது. புதிய சேவை மீட்பு தேதி இதுவரை அறிவிக்கப்படவில்லை.
வேலை அனுமதி விண்ணப்பங்களுக்கான மாற்று நடைமுறை
அனுமதியற்ற செயல்பாட்டை கட்டுப்படுத்த நிர்வாக அணுகல்கள் வரையறுக்கப்பட்டுள்ளன. சந்தேகத்திற்குரிய நிர்வாகக் கணக்குகள் முடக்கப்பட்டதுடன், நிர்வாக அமைப்புகளுக்கான firewall கட்டுப்பாடுகளும் அமல்படுத்தப்பட்டுள்ளன. சுயாதீன இணையப் பாதுகாப்பு நிபுணர்கள் தடயவியல் ஆய்வு நடத்தி வருகின்றனர். தரவு பாதுகாப்பு ஆணையத்துக்கும் ஆரம்ப அறிவிப்பு அனுப்பப்பட்டுள்ளது.
முதற்கட்ட ஆய்வில், பாதிக்கப்பட்ட தகவல்கள் கணக்கு சார்ந்த அடிப்படை விவரங்களாக இருக்கலாம் எனத் தெரிவிக்கப்பட்டுள்ளது. இதில் முதலாளி, முகவர் அல்லது பணியாளர் என்ற கணக்கு வகிபாகங்கள் அடங்கும். எத்தனை பேர் பாதிக்கப்பட்டிருக்கலாம் என்பது இன்னும் வெளியிடப்படவில்லை. இந்தச் சம்பவம் PHP நிரலாக்க மொழியில் அண்மையில் கண்டறியப்பட்ட பாதிப்புகளுடன் தொடர்புடையதல்ல என்றும் துறை தெரிவித்துள்ளது.
Ireland Employment Permits Portal முடங்கியிருந்தாலும், ஏற்கனவே கிடைத்த விண்ணப்பங்கள் துறையின் உள்புறத்தில் தொடர்ந்து செயல்படுத்தப்படுகின்றன. முடிவுகள் எட்டப்பட்டபோது விண்ணப்பதாரர்களுக்கு தகவல் அனுப்பப்படும். சேமிக்கப்பட்ட வரைவுகள், கட்டணம் செலுத்தப்பட வேண்டிய விண்ணப்பங்கள் மற்றும் பிற தகவல்கள் தளம் மீண்டும் திறக்கும்போது கிடைக்கும்.
முடக்கநிலை காரணமாக 28 நாள் காலவரம்பை மீறும் விண்ணப்பங்கள், புதுப்பிப்பு விண்ணப்பங்கள் மற்றும் Labour Market Needs Test விளம்பரத் தேவைகளுக்கு உரிய நெகிழ்வுத்தன்மை வழங்கப்படும் என துறை கூறியுள்ளது. புதிய விண்ணப்பங்களுக்கான மாற்று முறையை உருவாக்கி வருவதாகவும், அதன் விவரங்கள் பின்னர் அறிவிக்கப்படும் என்றும் தெரிவிக்கப்பட்டுள்ளது.
சம்பவத்தை பயன்படுத்தி வரும் சந்தேகமான மின்னஞ்சல், தொலைபேசி அழைப்பு அல்லது குறுஞ்செய்திகளுக்கு பதிலளிக்க வேண்டாம் என பயனர்களுக்கு எச்சரிக்கை விடுக்கப்பட்டுள்ளது. கடவுச்சொல், அடையாள ஆவணங்கள் அல்லது நிதித் தகவல்களை கோரும் தொடர்புகளை அதிகாரப்பூர்வ வழிகளில் சரிபார்க்க வேண்டும்.
