பிரான்ஸின் பல பகுதிகளில் மீட்பு நடவடிக்கைகள்
புஷ்-து-ரோன் பகுதியில் 86 மற்றும் 26 வயதுடைய இரு பெண்கள் அடித்தள அறையில் நீரில் மூழ்கி உயிரிழந்த நிலையில் கண்டெடுக்கப்பட்டனர். கோர்சிகாவிலும் கடுமையான வானிலை நிலவியது. வெள்ளநீர் 4×4 வாகனத்தை அடித்துச் சென்றதில், அதிலிருந்த ஒருவர் ஜன்னல் வழியாக தப்பினார். மற்றொரு ஆண் உயிரிழந்த நிலையில் கண்டெடுக்கப்பட்டார். நான்காவது உயிரிழப்பு குறித்து அதிகாரிகள் மேலதிக தகவல்களை வெளியிடவில்லை.
மொன்பெலியே மற்றும் மார்செய் நகரங்களுக்கு இடையிலுள்ள முரியேஸ், செயின்ட்-மார்டின்-து-க்ரா பகுதிகளில் வெள்ளத்தால் பாதிக்கப்பட்ட டஜன் கணக்கான மக்கள் அவசர தங்குமிடங்களில் தங்கவைக்கப்பட்டனர். அப்பகுதியில் ஒருவர் காயமடைந்ததாக தெரிவிக்கப்பட்டுள்ளது. சாலைகள் மற்றும் ரயில் பாதைகளும் பாதிக்கப்பட்டதாக போக்குவரத்து அமைச்சர் பிலிப் தபரோ குறிப்பிட்டுள்ளார்.
“நீர் இதுவரை இல்லாத அளவுக்கு உயர்ந்துள்ளது” என்று புஷ்-து-ரோன் பிராந்திய ஆளுநர் ஜாக் விட்கோவ்ஸ்கி தெரிவித்தார். பாதிக்கப்பட்டவர்களுக்கு உதவ அரசு அமைப்புகள் தீவிரமாக செயல்பட்டு வருவதாகவும் அவர் கூறினார்.
மேலும் ஒரு புயலுக்கான எச்சரிக்கை
இதற்கிடையில், அட்லாண்டிக் பகுதியில் இருந்து நகரும் ஆஸ்டின் புயல் பிரான்ஸின் வடமேற்குப் பகுதிகளை அடையும் என எதிர்பார்க்கப்படுகிறது. கோட்ஸ்-த’ஆர்மர், ஃபினிஸ்தேர், மோர்பிஹான், இல்-எ-விலேன் மற்றும் மாஞ்ச் ஆகிய ஐந்து மேற்கு மாவட்டங்களுக்கு வியாழக்கிழமை மாலை முதல் வெள்ளிக்கிழமை வரை ஆரஞ்சு நிலை காற்று எச்சரிக்கை விடுக்கப்பட்டுள்ளது.
Storm Adam flooding in France ஸ்பெயினின் கிழக்குப் பகுதிகளிலும் பெரும் பாதிப்பை ஏற்படுத்தியது. அங்கு குறைந்தது மூன்று பேர் உயிரிழந்தனர். பாதிக்கப்பட்டவர்களுக்கான மறுகட்டமைப்பு உதவியாக 23.5 மில்லியன் யூரோ நிதியை வலென்சியா பிராந்திய அரசு ஒதுக்கியுள்ளது.
