மேற்கு சிட்னி விமான நிலையத்துக்கு மட்டும் ஆரம்ப நடைமுறை
இந்த வசதி மேற்கு சிட்னி சர்வதேச விமான நிலையத்துக்கு வரும் அனைத்து விமான நிறுவனப் பயணிகளுக்கும் கிடைக்கும். விமான நிலையத்தின் முதல் சர்வதேச சேவையாக ஏர் நியூசிலாந்தின் ஆக்லாந்து விமானம் அக்டோபர் 26 அன்று இயக்கப்பட உள்ளது. பயணிகள் புறப்படும் நேரத்துக்கு முந்தைய 72 மணிநேரத்துக்குள் இணையப் படிவத்தை நிரப்ப வேண்டும். அதற்கு முன் சமர்ப்பிப்புகள் ஏற்கப்படாது.
படிவத்தை ஒரே அமர்வில் பூர்த்தி செய்ய வேண்டும். குடும்பத்தினர், 18 வயதுக்குட்பட்ட குழந்தைகள் உட்பட, ஒரே அறிவிப்பில் சேர்க்கப்படலாம். சமர்ப்பித்த பிறகு திருத்தம் தேவைப்பட்டால் புதிய அறிவிப்பை அளிக்க வேண்டும். சமர்ப்பிப்பின் பின்னர் கிடைக்கும் QR குறியீடு, ‘ATD Pass’ என அழைக்கப்படுகிறது; இது பயணப்பெட்டி பெறும் பகுதி அல்லது வெளியேறும் இடத்தில் அதிகாரிகளால் ஸ்கேன் செய்யப்படும்.
பாஸ்போர்ட், விமான எண், அவுஸ்திரேலிய தங்குமிட முகவரி, அவசர தொடர்பு விவரங்கள் மற்றும் அறிவிக்க வேண்டிய உணவு, தாவரம், விலங்கு பொருட்கள் அல்லது நாணயத் தகவல்களைத் தயாராக வைத்திருக்க வேண்டும். கைப்பேசி செயலிழந்தால் அதிகாரிகள் உதவுவார்கள்.
சிட்னி கிங்ஸ்ஃபோர்ட் ஸ்மித் உள்ளிட்ட பிற விமான நிலையங்களுக்கு வரும் பயணிகள் தற்போது காகித அட்டையைத் தொடர்ந்தும் பயன்படுத்த வேண்டும். விமானம் வேறு விமான நிலையத்துக்கு மாற்றப்பட்டாலும் காகித அட்டை தேவைப்படும். Australia Travel Declaration வசதியை நாடு முழுவதும் உள்ள சர்வதேச விமான நிலையங்கள் மற்றும் துறைமுகங்களுக்கு விரிவுபடுத்த அடுத்த நான்கு ஆண்டுகளில் 56 மில்லியன் அவுஸ்திரேலிய டொலருக்கும் மேல் ஒதுக்கப்பட்டுள்ளது.
