போராட்டத்தைத் தடுக்க டெல்லியில் பலத்த பாதுகாப்பு
போராட்டத்தை முன்னிட்டு டெல்லி காவல்துறை மற்றும் மத்திய ஆயுதக் காவல் படையைச் சேர்ந்த 20,000-க்கும் மேற்பட்ட வீரர்கள் பாதுகாப்புப் பணியில் ஈடுபடுத்தப்பட்டுள்ளனர். முன்னெச்சரிக்கை நடவடிக்கையாக இரவோடு இரவாக 400-க்கும் மேற்பட்டோர் கைது செய்யப்பட்டனர். அவர்களில் பிரபல யூடியூபர் துருவ் ரதீயும் குருகிராமில் உள்ள அவரது இல்லத்தில் வைத்து கைது செய்யப்பட்டுள்ளார்.
போராட்டக்காரர்கள் ஜந்தர் மந்தரை அடையாமல் தடுக்கும் வகையில் ராஜீவ் சவுக், புது டெல்லி, சென்ட்ரல் செக்ரடேரியட், படேல் சவுக், காஷ்மீரி கேட் உள்ளிட்ட 45 டெல்லி மெட்ரோ நிலையங்களின் நுழைவு மற்றும் வெளியேறும் வாயில்கள் மூடப்பட்டுள்ளன. டெல்லி மற்றும் ஹஸ்ரத் நிஜாமுதீன் ரயில் நிலையங்களுக்கு வரவிருந்த 250-க்கும் மேற்பட்ட ரயில்கள் அதிகாலை 4 மணி முதல் பிற்பகல் 2 மணி வரை ரத்து செய்யப்பட்டுள்ளன.
வெள்ளிக்கிழமை இரவு 10 மணி முதல் 24 மணி நேரத்துக்கு ஜன்பத்-கர்தவ்யா பாதை சந்திப்பைச் சுற்றிய 4 கிலோமீட்டர் பகுதியில் இணையச் சேவைகள் முடக்கப்பட்டுள்ளன. ஜந்தர் மந்தர் உள்ளிட்ட முக்கிய இடங்களைச் சுற்றி 6,500-க்கும் மேற்பட்ட வீரர்கள் குவிக்கப்பட்டு, பல அடுக்கு தடுப்புகள் அமைக்கப்பட்டுள்ளன. CJP protest in Delhi தொடர்பான நடவடிக்கைகளைப் பதிவு செய்ய 300-க்கும் மேற்பட்ட ஒலிப்பதிவு வசதி கொண்ட சிசிடிவி கேமராக்களும், காவல்துறையினருக்கு பாடி கேமராக்களும் பயன்படுத்தப்படுகின்றன.
