இந்திய மின்னணு மற்றும் தகவல் தொழில்நுட்ப அமைச்சகம் சிறுவர் பாலியல் சுரண்டல் மற்றும் துஷ்பிரயோக உள்ளடக்கங்கள் தொடர்பான அனைத்து விளம்பரங்களையும் அவற்றை அணுக வழிவகுக்கும் பதிவுகளையும் இன்ஸ்டாகிராமில் இருந்து உடனடியாக முடக்க வேண்டும் என அறிவுறுத்தியுள்ளது. மேலும் இவ்வகை விளம்பரங்கள் எவ்வாறு தளத்தின் பரிசோதனை முறைகளைத் தாண்டி வெளியிட அனுமதிக்கப்பட்டன என்பது குறித்து ஏழு நாட்களுக்குள் விரிவான விளக்கத்தை வழங்குமாறும் மெட்டாவிடம் கோரப்பட்டுள்ளது.
பிபிசி ஐ நடத்திய விசாரணையில் இந்தியாவில் உருவாக்கப்பட்ட ஒரு சோதனைக் கணக்கிற்கு இன்ஸ்டாகிராம் வழியாக பாலியல் சுட்டுமொழிகள் கொண்ட விளம்பரங்கள் காட்டப்பட்டதாக தெரிவிக்கப்பட்டது. பின்னர் சிறுவர்களை பாலியல் ரீதியாக துஷ்பிரயோகம் செய்வதுடன் தொடர்புடைய உள்ளடக்கங்களை விளம்பரப்படுத்தும் பதிவுகளும் காணப்பட்டதாகக் கூறப்பட்டது. அந்த விளம்பரங்களில் சில சட்டவிரோத உள்ளடக்கங்கள் விற்பனை செய்யப்படுவதாகக் கூறப்படும் டெலிகிராம் குழுக்கள் அல்லது சேனல்களுக்கு பயனர்களை வழிநடத்தியதாகவும் விசாரணையில் தெரியவந்துள்ளது.India News
இந்த விவகாரம் சமூக ஊடக தளங்களின் விளம்பர கண்காணிப்பு மற்றும் பாதுகாப்பு நடைமுறைகள் குறித்து தீவிர கேள்விகளை எழுப்பியுள்ளது. குறிப்பாக குழந்தைகள் மற்றும் இளம் பயனர்கள் இணையத்தில் பாதுகாப்பாக இருப்பதை உறுதி செய்வதில் தொழில்நுட்ப நிறுவனங்களின் பொறுப்பு மீண்டும் கவனத்திற்கு வந்துள்ளது.
இதற்கிடையில் மெட்டா நிறுவனம் சிறுவர் பாலியல் துஷ்பிரயோக உள்ளடக்கங்களுக்கு எதிராக பூஜ்ஜிய சகிப்புத்தன்மை கொள்கையைப் பின்பற்றுவதாக தெரிவித்துள்ளது. விதிமுறைகளை மீறும் உள்ளடக்கங்களையும் அதில் ஈடுபடுவோரையும் கண்டறிய செயற்கை நுண்ணறிவு உள்ளிட்ட மேம்பட்ட தொழில்நுட்பங்களை பயன்படுத்துவதாகவும் நிறுவனம் கூறியுள்ளது. எனினும் சட்டவிரோத செயல்களில் ஈடுபடுவோர் கண்காணிப்பு முறைகளைத் தவிர்க்க தொடர்ந்து முயற்சிப்பதால் இது ஒரு தொடர்ச்சியான சவாலாக இருப்பதாக மெட்டா சுட்டிக்காட்டியுள்ளது.
