ஜகாபூர் கிராமத்தைச் சேர்ந்த சோனத்துக்கும் சுக்பிர் சிங்குக்கும் 11 ஆண்டுகளுக்கு முன்பு திருமணம் நடைபெற்றது. காதலித்து திருமணம் செய்துகொண்ட இவர்களுக்கு இரண்டு குழந்தைகள் உள்ளனர். ஹரியானாவில் வேலை செய்து வந்த சுக்பிர் சிங், 15 நாட்களுக்கு முன்பு சொந்த ஊருக்கு வந்திருந்தார்.
சோனத்துக்கு உள்ளூரைச் சேர்ந்த இளைஞர் ஒருவருடன் தொடர்பு இருப்பதாக சுக்பிர் சிங் சந்தேகித்ததாக கூறப்படுகிறது. இதனால் கணவன், மனைவி இடையே அடிக்கடி தகராறு ஏற்பட்டது. பிரச்சினையைத் தீர்க்க பஞ்சாயத்து நடைபெற்ற நிலையில், அந்த உறவை முறித்துக்கொண்டு கணவருடன் வாழ்வதாக சோனம் உறுதியளித்ததாக தெரிவிக்கப்பட்டுள்ளது. இதையடுத்து அந்த இளைஞர் விஷம் குடித்து தற்கொலைக்கு முயன்றதாகவும் கூறப்படுகிறது.
சம்பவம் தொடர்பாக கணவரை தேடும் போலீசார்
இந்நிலையில், இன்று காலை மீண்டும் தகராறு ஏற்பட்டபோது சுக்பிர் சிங் சோனத்தை இருக்கையில் கட்டிவைத்து பெட்ரோல் ஊற்றி தீ வைத்ததாக போலீசார் கூறுகின்றனர். பின்னர் இரண்டு குழந்தைகளையும் அழைத்துக்கொண்டு அவர் அங்கிருந்து தப்பிச் சென்றதாக தெரிவிக்கப்பட்டுள்ளது.
வீட்டில் தீப்பற்றியதைப் பார்த்த அக்கம்பக்கத்தினர் தீயை அணைக்க முயன்றனர். தீயணைப்புத் துறையினர் சுமார் ஒன்றரை மணி நேரம் போராடி தீயை அணைத்தனர். பின்னர் வீட்டுக்குள் சோனத்தின் எலும்புக்கூடு மட்டும் இருக்கையில் இருந்தது கண்டுபிடிக்கப்பட்டது. அது பரிசோதனைக்காக அனுப்பி வைக்கப்பட்டுள்ளது. Kannauj woman burning case தொடர்பாக வழக்குப் பதிவு செய்த போலீசார், சுக்பிர் சிங்கைத் தேடி வருகின்றனர்.
