தூத்துக்குடி மாவட்டம் ஆறுமுகமங்கலத்தைச் சேர்ந்த ஐடி ஊழியர் கவின், மாற்று சமூகத்தைச் சேர்ந்த பெண்ணைக் காதலித்ததாகக் கூறப்படுகிறது. இதையடுத்து, 2025 ஜூலை 27 அன்று அந்தப் பெண்ணின் சகோதரர் சுர்ஜித்தால் கவின் வெட்டி கொலை செய்யப்பட்டதாக வழக்குப் பதிவு செய்யப்பட்டது.
பெற்றோர் மீதான குற்றப்பத்திரிகைக்கு நீதிமன்ற உத்தரவு
இந்த வழக்கில் சுர்ஜித், அவரது பெற்றோர் சரவணன் மற்றும் கிருஷ்ணகுமாரி, உறவினர் ஜெயபால் ஆகிய நால்வரை சிபிசிஐடி போலீஸார் கைது செய்தனர். கொலை மற்றும் வன்கொடுமை தடுப்புச் சட்டம் உள்ளிட்ட பல்வேறு பிரிவுகளின் கீழ் விசாரணை நடைபெற்றது.
நெல்லை மாவட்ட வன்கொடுமை தடுப்புச் சிறப்பு நீதிமன்றத்தில் வழக்கு விசாரணை நடைபெற்று வந்த நிலையில், சிசிடிவி காட்சிகள், தடய அறிவியல் ஆவணங்கள் மற்றும் கவினின் காதலி, பெற்றோர் உள்ளிட்ட 83 சாட்சிகளின் வாக்குமூலங்களை உள்ளடக்கிய சுமார் 800 பக்க குற்றப்பத்திரிகை தாக்கல் செய்யப்பட்டது.
Kavin murder case தொடர்பாக தங்கள் மீதான குற்றப்பத்திரிகையை ரத்து செய்யக் கோரி சரவணன், கிருஷ்ணகுமாரி, ஜெயபால் ஆகியோர் உயர்நீதிமன்ற மதுரை அமர்வில் மனுத் தாக்கல் செய்தனர். மனுவை விசாரித்த நீதிபதி விஜயகுமார், சரவணன் மற்றும் கிருஷ்ணகுமாரி மீதான குற்றப்பத்திரிகையை ரத்து செய்து உத்தரவிட்டார். ஜெயபாலின் மனுவைத் தள்ளுபடி செய்தார்.
