1985ஆம் ஆண்டு அறிமுகப்படுத்தப்பட்ட இந்தச் சட்டம் வெளிநாட்டு வேலைவாய்ப்பு நடவடிக்கைகளை ஒழுங்குபடுத்துதல், புலம்பெயர் தொழிலாளர்களின் உரிமைகள் மற்றும் நலன்களைப் பாதுகாத்தல், வெளிநாட்டு வேலைவாய்ப்பு வாய்ப்புகளை மேம்படுத்துதல் ஆகிய நோக்கங்களுக்காக உருவாக்கப்பட்டது. எனினும் உலக தொழிலாளர் சந்தையில் ஏற்பட்டுள்ள மாற்றங்கள், டிஜிட்டல் ஆட்சேர்ப்பு முறைகள் மற்றும் புதிய சவால்களை கருத்தில் கொண்டு தற்போதைய சட்டம் போதுமானதாக இல்லை என அரசு மதிப்பீடு செய்துள்ளது.Asia News
புதிய சட்டத்தின் மூலம் வெளிநாட்டு வேலைவாய்ப்பு முகவரகங்களை கண்காணிக்கும் நடைமுறைகள் வலுப்படுத்தப்படுவதுடன் வெளிநாடுகளுக்குச் செல்லும் இலங்கை தொழிலாளர்களுக்கான பாதுகாப்பு மற்றும் நலன்கள் மேலும் உறுதிப்படுத்தப்படவுள்ளன. அதேவேளை மனிதக் கடத்தல், போலி வேலைவாய்ப்பு மோசடிகள் மற்றும் சட்டவிரோத ஆட்சேர்ப்பு நடவடிக்கைகளுக்கு எதிராக கடுமையான சட்ட ஏற்பாடுகளும் இதில் உள்ளடக்கப்பட உள்ளதாக தெரிவிக்கப்படுகிறது.
இந்த சட்ட திருத்தத்திற்கான விரிவான கருத்துரு ஏற்கனவே தயாரிக்கப்பட்டுள்ள நிலையில் அதனை அடிப்படையாகக் கொண்டு புதிய சட்டமூலத்தை தயாரிக்க சட்ட வரைவாளருக்கு பணிப்புரை வழங்க அமைச்சரவை அனுமதி அளித்துள்ளது. புதிய சட்டம் இலங்கையின் வெளிநாட்டு வேலைவாய்ப்பு கொள்கைகளை சர்வதேச தரநிலைகளுக்கு ஏற்ப மாற்றியமைத்து வெளிநாடுகளில் பணிபுரியும் இலங்கையர்களின் உரிமைகளை மேலும் வலுப்படுத்தும் என அரசு நம்பிக்கை தெரிவித்துள்ளது.
