வாக்குவாதத்துக்குப் பிறகு மாணவி உயிரிழப்பு
செபத்தையாபுரம் அருகிலுள்ள சோலைபுதூர் வேதமாணிக்கபுரத்தைச் சேர்ந்த 17 வயது மாணவி, அப்பகுதியில் உள்ள பள்ளியில் 11ஆம் வகுப்பு படித்து வந்தார். அவரது உறவினரான முத்துராஜ், அங்குள்ள வெல்டிங் பட்டறையில் வேலை பார்த்து வந்தார். இருவருக்கும் நட்பு ஏற்பட்டு, பின்னர் காதலாக மாறியதாக கூறப்படுகிறது.
மாணவி வேறொருவருடன் செல்போனில் பேசுவதாக சந்தேகமடைந்த முத்துராஜ், சமீபகாலமாக அவருடன் தகராறில் ஈடுபட்டு வந்ததாக கூறப்படுகிறது. சனிக்கிழமை மதியம் சுமார் 3 மணியளவில் மாணவியின் வீட்டுக்குச் சென்ற அவர், வாக்குவாதத்தில் ஈடுபட்டுள்ளார். வாக்குவாதம் முற்றிய நிலையில், மாணவியை கத்தியால் குத்தியும் கழுத்தை நெரித்தும் கொலை செய்ததாக கூறப்படுகிறது.
அக்கம் பக்கத்தினர் மாணவியை மீட்டு செபத்தையாபுரம் அரசு ஆரம்ப சுகாதார நிலையத்துக்குக் கொண்டு சென்றனர். ஆனால், அவர் ஏற்கெனவே உயிரிழந்ததாக மருத்துவர்கள் தெரிவித்தனர். உடல் பிரேதப் பரிசோதனைக்காக தூத்துக்குடி அரசு மருத்துவக் கல்லூரி மருத்துவமனைக்கு அனுப்பப்பட்டது.
சம்பவத்துக்குப் பிறகு அங்கிருந்து தப்பிய முத்துராஜ், விஷம் குடித்து செபத்தையாபுரம் பேருந்து நிறுத்தத்தில் மயங்கிய நிலையில் கிடந்தார். அவரை மீட்ட போலீஸார் தூத்துக்குடி அரசு மருத்துவமனையில் அனுமதித்துள்ளனர். Thoothukudi schoolgirl murder குறித்து போலீஸார் தொடர்ந்து விசாரித்து வருகின்றனர்.






























