பொதுவாக, புதுமண தம்பதிகள் தேனிலவு புகைப்படங்களையும் மகிழ்ச்சியான தருணங்களையும் நண்பர்களுடன் பகிர்வது வழக்கம். ஆனால் கணவன், மனைவிக்குள் தனிப்பட்டதாக இருக்கும் நிகழ்வுகளை கேமரா முன்பு பதிவு செய்து வெளியிடுவது சரியா என்ற விவாதம் தற்போது தீவிரமடைந்துள்ளது.
வைரலாகும் ரீல்ஸ் வீடியோ எழுப்பும் தனியுரிமை கேள்வி
சமூக ஊடகங்களில் பரவும் அந்த வீடியோவில், தம்பதிகள் அறைக்குள் இருப்பது தெரிகிறது. கணவர் கேமரா முன்பு தயக்கம் காட்டுகிறார். மனைவி அவரை சமாதானப்படுத்தும் காட்சிகளும் பதிவாகியுள்ளன. பின்னர் இருவரும் தனிப்பட்ட தருணங்களை வெளிப்படுத்தும் வகையில் வீடியோ எடுத்ததாகக் கூறப்படுகிறது.
வீடியோவின் முடிவில், இதுகுறித்த கருத்துகளைப் பகிருமாறு பார்வையாளர்களிடம் கேட்கப்படுகிறது. இதற்கு பலர் கடும் எதிர்ப்புத் தெரிவித்துள்ளனர். ரீல்ஸ் பார்வைகள் மற்றும் கருத்துகளுக்காக தனியுரிமையை மீறுவது ஏற்றுக்கொள்ள முடியாதது என்று அவர்கள் கூறியுள்ளனர்.
சிலர், இது சம்பந்தப்பட்டவர்களின் தனிப்பட்ட முடிவு என்றும், பிடிக்கவில்லை என்றால் பார்க்காமல் செல்லலாம் என்றும் கருத்து தெரிவித்துள்ளனர். அதே நேரத்தில், இதுபோன்ற பதிவுகள் மற்றவர்களையும் அதேபோன்ற உள்ளடக்கத்தை உருவாக்கத் தூண்டலாம் என்ற கவலையும் முன்வைக்கப்பட்டுள்ளது.
முதலிரவு காட்சிகள், குழந்தைகள் முன்னிலையில் தம்பதிகளை அறைக்குள் அனுப்புவது, அறைக்குள் நடப்பதைப் பதிவு செய்வது போன்ற உள்ளடக்கங்களும் ரீல்ஸ்களில் இடம்பெறுவதாகக் கூறப்படுகிறது. இவை குடும்ப உறவுகளில் தேவையற்ற பிரச்சினைகளை உருவாக்கலாம் என விமர்சகர்கள் தெரிவிக்கின்றனர்.
சில வாரங்களுக்கு முன்பு ஒளிபரப்பான ஒரு தொலைக்காட்சி விவாதத்திலும், ரீல்ஸ் எடுக்க விரும்பும் துணை மற்றும் அதற்கு விருப்பமில்லாத கணவன் அல்லது மனைவிக்கிடையேயான கருத்து வேறுபாடுகள் பேசப்பட்டன. இந்நிலையில், வைரலாகும் ரீல்ஸ் வீடியோ தொடர்பாக பொறுப்பான பதிவேற்றம் மற்றும் தனியுரிமை பாதுகாப்பு அவசியம் என பலர் வலியுறுத்துகின்றனர்.
ஆபாசமாகக் கருதப்படும் பதிவுகள் மீது சட்டப்படி நடவடிக்கை எடுக்க வேண்டும் என்ற கோரிக்கையும் சமூக ஊடகப் பயனர்களிடையே எழுந்துள்ளது. எனினும், சம்பந்தப்பட்ட தம்பதியின் அடையாளம் அல்லது வீடியோ எடுக்கப்பட்ட இடம் குறித்த உறுதியான தகவல் வெளியாகவில்லை.
