நீங்கள் கேட்காமல் WhatsApp இலிருந்து OTP (Verification Code) குறுஞ்செய்தி வந்தால் வேறு ஒருவர் உங்கள் தொலைபேசி எண்ணைப் பயன்படுத்தி கணக்கை பதிவு செய்ய முயற்சித்து இருக்கலாம். அந்த OTP ஐ எந்த சூழ்நிலையிலும் மற்றவர்களுடன் பகிரக்கூடாது.
அதேபோல் WhatsApp இன் Linked Devices பகுதியில் உங்களுக்குத் தெரியாத கணினி அல்லது வேறு சாதனம் இணைக்கப்பட்டிருந்தால் அது சந்தேகத்திற்குரியதாக இருக்கலாம். உங்கள் அனுமதியின்றி இணைக்கப்பட்ட சாதனங்களை உடனடியாக நீக்குவது பாதுகாப்பான நடவடிக்கையாகும்.
உங்கள் மொபைல் SIM திடீரென செயலிழப்பது சிக்னல் இல்லாமல் போவது அல்லது அழைப்புகள் குறுஞ்செய்திகள் வராமல் இருப்பது போன்ற நிலைகளும் கவனிக்க வேண்டியவை. சில சந்தர்ப்பங்களில் இது SIM Swap எனப்படும் மோசடியின் அறிகுறியாக இருக்கலாம்.
மேலும் நீங்கள் அனுப்பாத செய்திகள் உங்கள் WhatsApp கணக்கிலிருந்து அனுப்பப்படுவது அல்லது Two-Step Verification Email போன்ற பாதுகாப்பு அமைப்புகள் உங்கள் அனுமதியின்றி மாற்றப்பட்டிருப்பது போன்றவை கணக்கின் பாதுகாப்பு பாதிக்கப்பட்டிருக்கலாம் என்பதற்கான முக்கிய எச்சரிக்கைகளாகும்.
இத்தகைய அறிகுறிகள் ஏதேனும் தென்பட்டால் முதலில் WhatsApp இல் உள்ள அனைத்து தெரியாத Linked Devices களையும் நீக்க வேண்டும். அதன் பிறகு Two-Step Verification PIN-ஐ மாற்றி உங்கள் மொபைல் சேவை வழங்குநரை தொடர்புகொண்டு SIM பாதுகாப்பை உறுதிப்படுத்த வேண்டும். தேவையானால் WhatsApp Support ஐ தொடர்புகொண்டு கணக்கை மீட்டெடுக்க உதவி பெறலாம்.
சிறிய அலட்சியமும் உங்கள் தனிப்பட்ட தகவல்கள் மற்றும் உரையாடல்களின் பாதுகாப்பை பாதிக்கக்கூடும். எனவே WhatsApp பாதுகாப்பு அம்சங்களை எப்போதும் செயல்பாட்டில் வைத்திருப்பதுடன் சந்தேகத்திற்கிடமான எந்த நடவடிக்கையையும் உடனடியாக கவனிப்பது மிகவும் முக்கியம்.
