அரசியல்
ஐந்து நீதியரசர்கள் கொண்ட அமர்வு முன்னிலையில் நேற்று விசாரணைகள் ஆரம்பிக்கப்பட்டன. பிரதம நீதியரசர் ப்ரீத்தி பத்மன் சூரசேன மற்றும் நீதியரசர்கள் அச்சல வெங்கப்புலி, அர்ஜுன ஒபேசேகர, சம்பத் அபேகூன், கிஹான் குலதுங்க ஆகியோர் அமர்வில் இடம்பெற்றுள்ளனர்.
அரசாங்கம் அரசியலமைப்புத் திருத்தச் சட்டமூலத்தை ஆகஸ்ட் 18ஆம் திகதி நாடாளுமன்றத்தில் சமர்ப்பித்ததைத் தொடர்ந்து, அது வர்த்தமானியில் வெளியிடப்பட்டது. அதன் பின்னர், பொதுமக்களுக்கு உச்ச நீதிமன்றத்தில் சட்டமூலத்தைச் சவால் செய்ய வாய்ப்பு வழங்கப்பட்டது.
நேற்றைய விசாரணையின்போது, மனுதாரர்கள் சார்பில் முன்னிலையான சட்டத்தரணிகள் வழக்கை முழு நீதியரசர் அமர்வுக்கு மாற்றுமாறு கோரினர். திருத்தச் சட்டமூலத்தின் சில விதிகள் நீதித்துறையின் சுயாதீனத்துக்கு பாதிப்பை ஏற்படுத்தக்கூடும் என்ற கவலைகள் முன்வைக்கப்பட்டன. எனினும், அந்தக் கோரிக்கையை உச்ச நீதிமன்றம் நிராகரித்து, ஐந்து நீதியரசர்கள் கொண்ட அமர்விலேயே விசாரணையைத் தொடர்ந்தது. பின்னர் விசாரணை இன்று வரை ஒத்திவைக்கப்பட்டது.
நீதியரசர்களின் ஓய்வூதிய வயது தொடர்பில் சர்ச்சை
உயர் நீதிமன்றங்களின் நீதியரசர்களுக்கான ஓய்வூதிய வயது தொடர்பான விதிகள், முன்மொழியப்பட்ட திருத்தத்தில் முக்கிய சர்ச்சைக்குரிய அம்சமாக உள்ளன. இந்த வயது வரம்பில் மாற்றம் செய்வது நீதித்துறையின் சுயாதீனத்தைப் பாதிக்குமா என சட்டத்துறையினரும் ஏனைய தரப்பினரும் கேள்வி எழுப்பியுள்ளனர். அரசாங்கம் திருத்தச் சட்டமூலத்தையும் அதன் விதிகளையும் ஆதரித்துள்ளது.
சட்டமூலத்தின் ஏதேனும் விதி நடைமுறையிலுள்ள அரசியலமைப்புடன் முரண்படுகிறதா என்பதை உச்ச நீதிமன்றம் தீர்மானிக்கும். மக்கள் வாக்கெடுப்பு தேவையில்லை என நீதிமன்றம் தீர்மானித்தால், நாடாளுமன்றத்தில் மூன்றில் இரண்டு பெரும்பான்மையுடன் சட்டமூலம் நிறைவேற்றப்படலாம். சில விதிகளுக்கு மக்கள் அங்கீகாரம் அவசியம் எனத் தீர்மானிக்கப்பட்டால், நாடாளுமன்ற பெரும்பான்மையுடன் வாக்கெடுப்பும் நடத்தப்பட வேண்டும்.
விசாரணைகள் நிறைவடைந்த பின்னர், நீதிமன்றத்தின் தீர்மானம் நாடாளுமன்ற சபாநாயகருக்கு அறிவிக்கப்படும்.
