மேலும் 1,376 தோட்ட வீடுகளும் 1,474 கிராமப்புற வீடுகளும் அதிக ஆபத்தான பகுதிகளாக அடையாளம் காணப்பட்டுள்ளதால் மொத்தமாக 3,434 குடும்பங்களை மீள்குடியேற்ற வேண்டிய நிலை ஏற்பட்டுள்ளது. இதனையடுத்து மீள்குடியேற்ற நடவடிக்கைகளை விரைவுபடுத்துமாறு ஜனாதிபதி அதிகாரிகளுக்கு பணிப்புரை வழங்கினார். தனியார் நிறுவனங்கள் பயன்படுத்திவரும் அரச காணிகளை மீள்குடியேற்றத் திட்டங்களுக்காக விரைவாக விடுவிக்க தேவையான நடவடிக்கைகளையும் அவர் வலியுறுத்தினார்.
வீடுகளை இழந்த மக்களுக்கு விரைவில் புதிய வீடுகள் கிடைக்க வேண்டும் என்பதற்காக திட்டங்கள் மற்றும் அறிக்கைகளைக் கடந்து செயற்பாடுகள் நடைமுறைப்படுத்தப்பட வேண்டும் எனவும் ஜனாதிபதி குறிப்பிட்டார். மேலும் இடம்பெயர்வதில் தயக்கம் காட்டும் மக்களுக்கு ஜூன் 15 வரை அவகாசம் வழங்குமாறும் அவர் தெரிவித்தார். இதனுடன் விவசாய நிலங்களில் தேங்கியுள்ள மணல் மற்றும் கற்களை அகற்ற ஏக்கருக்கு ரூ.25,000 வழங்க தீர்மானிக்கப்பட்டதுடன் பாதிக்கப்பட்ட 21 சாலை அபிவிருத்தித் திட்டங்களும் இந்த ஆண்டுக்குள் நிறைவு செய்யப்பட வேண்டும் என ஜனாதிபதி உத்தரவிட்டார்.
