கர்தினாலும் ஏனைய அருட்தந்தைகளும் குறித்து சமூக ஊடகங்களில் பரப்பப்படும் அவதூறான மற்றும் தவறான தகவல்களை வன்மையாகக் கண்டித்துள்ள பேரவை வெளியிட்டுள்ள ஊடக அறிக்கையில் ஈஸ்டர் தாக்குதலை பயன்படுத்தி கர்தினால் தனது பதவிக்காலத்தை நீடிக்க முயற்சிப்பதாக கூறப்படும் பிரசாரம் முற்றிலும் பொய்யானதும் பொதுமக்களை தவறாக வழிநடத்தும் முயற்சியுமாகும் என தெரிவித்துள்ளது.
கத்தோலிக்க திருச்சபை சட்டத்தின்படி 75 வயதை எட்டும் ஆயர்கள் தங்களது ஓய்வுக் கடிதத்தை திருத்தந்தைக்கு சமர்ப்பிக்க வேண்டும் என்றும் அந்த ஓய்வை ஏற்றுக்கொள்வதா அல்லது பதவிக்காலத்தை நீடிப்பதா என்பதை தீர்மானிக்கும் முழு அதிகாரம் திருத்தந்தைக்கு மட்டுமே இருப்பதாகவும் அறிக்கையில் சுட்டிக்காட்டப்பட்டுள்ளது. கர்தினால் மெல்கம் ரஞ்சித் ஆண்டகையும் தனது 75ஆவது வயதில் ஓய்வுக் கடிதத்தை முறையாக சமர்ப்பித்துள்ள நிலையில் திருத்தந்தையின் இறுதி முடிவு வெளியாகும் வரை அவர் தனது பணிகளைத் தொடர வேண்டியது திருச்சபை சட்டத்தின் கட்டாய விதியாகும் என்றும் பேரவை விளக்கியுள்ளது.
மேலும் திருச்சபை நிர்வாகத்தை அரசியல் அதிகாரப் போட்டிகளுடன் ஒப்பிட முடியாது என்றும் ஈஸ்டர் தாக்குதலில் பாதிக்கப்பட்டவர்களுக்கு நீதி கிடைக்க கர்தினால் முன்னெடுத்து வரும் அர்ப்பணிப்புமிக்க பணிகளுக்கு இலங்கையின் ஒட்டுமொத்த கத்தோலிக்க சமூகமும் தொடர்ந்து முழுமையான ஆதரவை வழங்கும் என கத்தோலிக்க ஆயர்கள் பேரவை உறுதிபட தெரிவித்துள்ளது.
