அமெரிக்க கடற்படை வீரர் பாலார்ட், ஒகினாவா தலைநகர் நாஹாவில் உள்ள ஹோட்டலில் 39 வயதான அன்னா யாகியை கொலை செய்ததாக சந்தேகிக்கப்படுகிறார். குற்றப்பத்திரிகை ஆவணத்தை மேற்கோள்காட்டிய தகவல்களின்படி, அக்டோபர் 3ஆம் தேதி தொலைபேசி கம்பியால் யாகியின் கழுத்தை நெரித்ததாகவும், பின்னர் அவரது முதுகுப்பை மற்றும் பணப்பையை எடுத்துச் சென்றதாகவும் குற்றம் சாட்டப்பட்டுள்ளது.
ஒகினாவாவில் தொடரும் எதிர்ப்பு
பாலார்ட் குற்றச்சாட்டுகளை மறுத்ததாக தெரிவிக்கப்பட்டது. எனினும், விசாரணையாளர்களை மேற்கோள்காட்டிய ஜப்பானிய ஊடகங்கள், சம்பவத்தில் தமக்கு தொடர்பு இருப்பதைச் சுட்டிக்காட்டும் சில வாக்குமூலங்களை அவர் அளித்ததாக கூறியுள்ளன. சந்தேகநபர் என நம்பப்படும் ஒருவர் யாகியுடன் ஹோட்டலுக்குள் சென்று, பின்னர் அவரது உடைமைகளுடன் தனியாக வெளியேறும் காட்சிகள் பாதுகாப்பு கேமராவில் பதிவாகியுள்ளதாகவும் தெரிவிக்கப்பட்டுள்ளது.
இந்த வழக்கு ஜப்பானில் கடும் கோபத்தை ஏற்படுத்தியுள்ளது. Okinawa Marine murder case குறித்து பிரதமர் சனாயே தகாய்ச்சி, இது “கொடூரமான மற்றும் அருவருப்பான” குற்றம் எனக் கூறினார். அமெரிக்காவிடம் ஜப்பான் அரசு வலுவான எதிர்ப்பை பதிவு செய்து, கடுமையான ஒழுங்கு நடவடிக்கை மற்றும் மீண்டும் இத்தகைய சம்பவங்கள் நடக்காத வகையில் விரிவான நடவடிக்கைகளை கோரியுள்ளது.
ஒகினாவாவில் சுமார் 55,000 அமெரிக்க ராணுவத்தினர் உள்ளனர். இம்மாத தொடக்கத்தில் நாஹா மற்றும் டோக்கியோவில் தலா சுமார் 100 பேர் போராட்டத்தில் ஈடுபட்டனர். ஒகினாவா ஆளுநர் ஜென்டா கோஜா, அமெரிக்கா இதுபோன்ற சம்பவங்களைத் தடுக்க நடவடிக்கை எடுக்க வேண்டும் என்றும், இந்தக் குற்றச்சாட்டு ஒழுக்கக் குறைபாட்டைக் காட்டுவதாகவும் கூறினார்.
