துபாய் சாலைகள் மற்றும் போக்குவரத்து ஆணையம் (RTA), அல் கலீஜ் தெரு சுரங்கப்பாதையை ஞாயிற்றுக்கிழமை திறந்தது. இன்ஃபினிட்டி பாலத்தின் இறக்கப்பாதை முடியும் இடத்திலிருந்து அல் கலீஜ் தெரு–அல் வுஹைதா தெரு சந்திப்பு வரை இந்தப் பாதை அமைக்கப்பட்டுள்ளது.
டெய்ரா மற்றும் சுற்றுப்புறப் பகுதிகளுக்கான இணைப்பு மேம்பாடு
இந்தச் சுரங்கப்பாதை டெய்ரா, அல் மம்சார், அபு ஹைல், அல் வுஹைதா, துபாய் ஐலண்ட்ஸ், வாட்டர்ஃபிரண்ட் மார்க்கெட் மற்றும் அல் ஹம்ரியா துறைமுகம் உள்ளிட்ட பகுதிகளுக்கான அணுகலை மேம்படுத்தும் என எதிர்பார்க்கப்படுகிறது. குடியிருப்புப் பகுதிகள், வர்த்தக மையங்கள் மற்றும் சுற்றுலாத் தலங்களுக்கு இடையிலான இணைப்பை இது வலுப்படுத்தும் என்று RTA தலைமை இயக்குநர் மட்டார் அல் தாயர் தெரிவித்தார்.
அல் ஷிந்தகா வழித்தட மேம்பாட்டுத் திட்டத்தின் ஒரு பகுதியாக இந்தப் பணிகள் மேற்கொள்ளப்பட்டுள்ளன. மொத்தம் 13 கிலோமீட்டர் நீளமுள்ள இந்த வழித்தடத்தில் 15 சந்திப்புகள் மேம்படுத்தப்படுகின்றன. திட்டம் முழுமையாக முடிந்த பிறகு, பயண நேரம் 1 மணி 44 நிமிடங்களிலிருந்து 16 நிமிடங்களாகக் குறையும் என RTA தெரிவித்துள்ளது.
இந்தத் திட்டத்தில் துபாய் க்ரீக் மீது 1,425 மீட்டர் நீளப் பாலமும் கட்டப்பட்டு வருகிறது. நான்கு பாதைகள் கொண்ட அந்தப் பாலம், ஒரு மணி நேரத்தில் சுமார் 16,000 வாகனங்களை கையாளும். புதிதாகத் திறக்கப்பட்ட Dubai Al Khaleej Street Tunnel சுரங்கப்பாதையில் துபாய் நகரக் காட்சியைச் சித்தரிக்கும் பெரிய மொசைக் ஓவியமும் இடம்பெற்றுள்ளது. சுமார் 3.6 கோடி மொசைக் துண்டுகளால் உருவாக்கப்பட்ட இந்த ஓவியத்தை எமிராட்டி கலைஞர் மரியம் அல் ஹத்பூர் வடிவமைத்துள்ளார்.
கட்டுமானத்தில் அகழப்பட்ட பொருட்களில் சுமார் 77 சதவீதம், அதாவது 522,000 கன மீட்டர் அளவு, மீண்டும் பயன்படுத்தப்பட்டதாக RTA கூறியது. பணிகளில் 2,200 பொறியாளர்கள், தொழில்நுட்ப நிபுணர்கள் மற்றும் தொழிலாளர்கள் ஈடுபட்டனர். காயங்கள் எதுவும் பதிவாகாமல் கிட்டத்தட்ட 1.1 கோடி பணிநேரங்கள் நிறைவு செய்யப்பட்டதாகவும் ஆணையம் தெரிவித்துள்ளது.
