Global Talent திட்டத்தையும் ஆய்வு செய்த குழு, அது பொதுவாகச் சிறப்பாக செயல்படுவதாகவும், சில சிறிய மாற்றங்கள் போதுமானவை என்றும் தெரிவித்துள்ளது. அந்தத் திட்டத்தின் முக்கிய விண்ணப்பதாரர்களில் 60 சதவீதம் பேர் உயர்கல்வித் துறையைச் சேர்ந்தவர்கள்; தொழில்நுட்பத் துறை 15 சதவீதத்துடன் அடுத்த முக்கியப் பிரிவாக உள்ளது.
Innovator Founder route குறித்து குழுவின் கவலைகள்
Innovator Founder route மூலம் குடியேறும் நிறுவனர்கள், மூன்று ஆண்டுகளுக்குப் பிறகு நிரந்தர குடியேற்றத்துக்கு விண்ணப்பிக்கும் நேரத்தில் நடத்தும் நிறுவனங்களின் சராசரி வருவாய், சிறிய சுயாதீன காபி கடையின் வருவாய்க்கு நிகராக இருப்பதாக அறிக்கை கூறுகிறது. இத்திட்ட நிறுவனங்கள் பொதுவாக ஒன்று அல்லது இரண்டு பேரையே வேலைக்கு அமர்த்துகின்றன; சில நேரங்களில் அந்த எண்ணிக்கையில் நிறுவனர்களும் அடங்குவர். எனவே, குறிப்பிடத்தக்க வேலைவாய்ப்புகளை உருவாக்கும் நோக்கம் நிறைவேறவில்லை என குழு மதிப்பிட்டுள்ளது.
சில வெற்றிகரமான விசா பெற்றவர்களின் செயல்திறன், பெரும்பாலானவர்களின் மோசமான முடிவுகளை ஈடுகட்டவில்லை என்றும், நீண்ட காலத்தில் இத்திட்டம் அரசுக்கு நிதிச்சுமையை ஏற்படுத்தக்கூடும் என்றும் தெரிவிக்கப்பட்டுள்ளது.
அரசு திட்டத்தைத் தொடர விரும்பினால், நிரந்தர குடியேற்றத்துக்கான தகுதிக் காலத்தை மூன்று ஆண்டுகளில் இருந்து ஐந்து ஆண்டுகளாக உயர்த்தவும், கடுமையான செயல்திறன் அளவுகோல்களைப் பயன்படுத்தவும் குழு பரிந்துரைத்துள்ளது. இரு விசா வழித்தடங்களுக்கான வழிகாட்டுதல்களையும் உள்துறை அலுவலகம் முழுமையாக மறுஆய்வு செய்ய வேண்டும் எனவும் கூறப்பட்டுள்ளது.
































