Convention Travel Document (CTD) – அகதிகளின் சர்வதேச பயண ஆவணம் அகதிகள் மற்றும் நாடற்றவர்களுக்கு சர்வதேச பயணத்தை மேற்கொள்ள உதவும் முக்கிய ஆவணமாக Convention Travel Document (CTD) விளங்குகிறது. 1951 அகதிகள் ஒப்பந்தம் மற்றும் 1954 நாடற்றவர்கள் ஒப்பந்தத்தின் அடிப்படையில் இந்த ஆவணம் வழங்கப்படுகிறது.
தங்களது சொந்த நாட்டின் பாஸ்போர்ட்டைப் பெற முடியாத அகதிகள், இந்த CTD-யை பயன்படுத்தி பல்வேறு நாடுகளுக்கு சட்டபூர்வமாக பயணம் செய்யலாம்.
இது ஒரு சாதாரண பாஸ்போர்ட்டைப் போலவே செயல்படுகிறது. இருப்பினும் பயணம் செய்யும் நாட்டின் விசா விதிமுறைகளை தனித்தனியாக பின்பற்ற வேண்டும். கல்வி வேலைவாய்ப்பு குடும்ப சந்திப்பு மற்றும் பிற அவசியமான காரணங்களுக்காக வெளிநாடுகளுக்கு செல்ல CTD உதவுகிறது. அதே நேரத்தில், அகதிகள் தங்கள் சொந்த நாட்டிற்கு பயணம் செய்வது அவர்களின் அகதி அந்தஸ்தை பாதிக்கக்கூடியதால் அத்தகைய பயணங்களுக்கு முன் சட்ட ஆலோசனை பெறுவது முக்கியமாக கருதப்படுகிறது.
UNHCR தகவல்களின்படி CTD ஆவணம் உலகின் பல நாடுகளால் அங்கீகரிக்கப்பட்டுள்ளதுடன் அகதிகளின் பாதுகாப்பான மற்றும் சட்டபூர்வமான சர்வதேச பயணத்திற்கு முக்கிய கருவியாக செயல்படுகிறது.
யார் CTD பெற தகுதியானவர்கள்?
- அகதி அந்தஸ்து (Refugee Status) பெற்றவர்கள்
- நாடற்றவர் (Stateless Person) என அதிகாரப்பூர்வமாக அங்கீகரிக்கப்பட்டவர்கள்
- 1951 அல்லது 1954 ஒப்பந்தங்களில் கையெழுத்திட்ட நாட்டில் சட்டபூர்வமாக வசிப்பவர்கள்
CTD வைத்திருப்பதால் கிடைக்கும் நன்மைகள்
1. பாதுகாப்பான சர்வதேச பயணம்
CTD மூலம் தங்கியிருக்கும் நாட்டை விட்டு வெளியே சென்று மீண்டும் திரும்ப முடியும். அதே நேரத்தில் தாய்நாட்டிற்கு கட்டாயமாக திருப்பி அனுப்பப்படுவதிலிருந்து பாதுகாப்பும் கிடைக்கிறது.
2. வேலை மற்றும் கல்வி வாய்ப்புகள்
வெளிநாடுகளில் வேலை கல்வி அல்லது பயிற்சி வாய்ப்புகளுக்காக விண்ணப்பிப்பது எளிதாகிறது.
3. குடும்ப சந்திப்பு
வேறு நாடுகளில் வாழும் குடும்ப உறுப்பினர்களை சந்திக்க பயணம் செய்ய உதவுகிறது.
4. அடையாள ஆவணமாக பயன்பாடு
சில நாடுகளில் வங்கி கணக்கு திறத்தல், இணைய சேவைகள், நிதி சேவைகள் போன்றவற்றிற்கும் CTD அடையாள ஆவணமாக ஏற்றுக்கொள்ளப்படலாம்.
CTD இருந்தால் விசா தேவையில்லையா?
CTD இருந்தாலும் நீங்கள் செல்லும் நாட்டின் விசா விதிமுறைகளை கட்டாயம் பின்பற்ற வேண்டும். ஒவ்வொரு நாடும் தனித்தனி விதிகளை கொண்டிருக்கிறது. சில நாடுகள் CTD வைத்திருப்பவர்களுக்கு விசா விலக்கு வழங்கலாம் சில நாடுகள் விசாவை கட்டாயமாக கோரலாம்.
அகதிகள் தங்கள் சொந்த நாட்டிற்கு செல்லலாமா?
பொதுவாக இது பரிந்துரைக்கப்படாது. ஒரு அகதி தனது தாய்நாட்டிற்கு திரும்பிச் சென்றால் அவர் அந்த நாட்டின் பாதுகாப்பை மீண்டும் ஏற்றுக்கொண்டதாக அதிகாரிகள் கருதக்கூடும். இதனால் அகதி அந்தஸ்து அல்லது பாதுகாப்பு உரிமை பாதிக்கப்பட வாய்ப்பு உள்ளது. எனவே பயணத்திற்கு முன் சட்ட ஆலோசனை பெறுவது அவசியம்.
நாடற்றவர்களுக்கான பயண ஆவணங்கள்
நாடற்றவர்கள் 1954 ஒப்பந்தத்தின் கீழ் தனிப்பட்ட Travel Document பெற முடியும். இது அவர்களுக்கு சர்வதேச பயணம் செய்யவும் பல நாடுகளில் சட்டபூர்வமான அடையாள ஆவணமாகவும் பயன்படுகிறது.
ICAO புதிய விதிமுறைகள்
சர்வதேச விமானப் போக்குவரத்து அமைப்பான ICAO விதிகளின்படி, தற்போது CTD-கள் Machine Readable Travel Documents ஆக இருக்க வேண்டும். கையால் எழுதப்பட்ட பழைய ஆவணங்கள் படிப்படியாக நீக்கப்பட்டு வருகின்றன.
