சமூக வீடுகள் (HLM) என்பது குறைந்த மற்றும் நடுத்தர வருமானம் கொண்ட மக்களுக்காக அரசின் ஆதரவுடன் வழங்கப்படும் வீடுகளாகும். இவ்வீடுகள் ஒதுக்கப்படுவதற்கு விண்ணப்பதாரர்களின் வருமானம் அரசு நிர்ணயித்துள்ள குறிப்பிட்ட வரம்புகளை மீறாமல் இருக்க வேண்டும். இந்த வருமான வரம்புகள் ஒவ்வொரு ஆண்டும் புதுப்பிக்கப்படுகின்றன.

மேலும் வீடு வசிக்க உள்ள குடும்பத்தில் உள்ள நபர்களின் எண்ணிக்கை மற்றும் அந்த வீடு அமைந்துள்ள பகுதி ஆகியவற்றின் அடிப்படையில் தகுதி நிர்ணயம் செய்யப்படுகிறது. 2026 ஆம் ஆண்டில் சமூக வீடுகளுக்கு விண்ணப்பிப்பவர்களுக்கு 2024 ஆம் ஆண்டின் Reference Tax Income கணக்கில் எடுத்துக்கொள்ளப்படும். இந்த வருமான விவரம் 2025 ஆம் ஆண்டு வழங்கப்படும் வரி அறிவிப்பில் குறிப்பிடப்பட்டிருக்கும்.

ஆனால் விண்ணப்பதாரரின் சமீபத்திய வருமானம் 2024 ஆம் ஆண்டின் வருமானத்தை விட குறைந்தது 10 சதவீதம் குறைந்திருந்தால் 2025 ஆம் ஆண்டின் வருமானம் அல்லது விண்ணப்பிக்கும் தேதிக்கு முந்தைய 12 மாதங்களின் வருமானத்தை கணக்கில் எடுத்துக்கொள்ள முடியும்.

இதற்கான உரிய ஆதார ஆவணங்களை சமர்ப்பிப்பது கட்டாயமாகும். சமூக வீடுகள் அவை கட்டப்பட்ட நிதி உதவி முறையை அடிப்படையாகக் கொண்டு நான்கு வகைகளாக பிரிக்கப்பட்டுள்ளன. PLAI வகை வீடுகள் மிகுந்த பொருளாதார சிரமத்தில் உள்ளவர்களுக்காக ஒதுக்கப்பட்டவை. PLUS வகை வீடுகள் பாரம்பரிய சமூக வீடுகளாகும்; மொத்த சமூக வீடுகளில் 80 சதவீதத்திற்கும் அதிகமானவை இந்த வகைக்குள் வருகின்றன.

PLS வகை வீடுகள் வீட்டு தேவை அதிகமாக உள்ள பகுதிகளில் அமைந்துள்ளவை பாரம்பரிய HLM வீடுகளுக்கு தகுதி இல்லாதவர்களும், தனியார் வாடகை வீடுகளை ஏற்க முடியாதவர்களும் பயன்பெறும் வகையில் இவை வழங்கப்படுகின்றன. PLI வகை வீடுகள் பாரம்பரிய சமூக வீடுகளுக்கு வருமானம் அதிகமாக இருந்தாலும், தனியார் வாடகை வீடுகளுக்கு வருமானம் போதாதவர்களுக்காக ஒதுக்கப்படுகின்றன.

இவ்வாறு சமூக வீடுகள் பல்வேறு வருமான நிலை கொண்ட மக்களின் தேவைகளை பூர்த்தி செய்யும் வகையில் திட்டமிடப்பட்டு வழங்கப்படுகின்றன.