புத்தகத் தேர்வு மற்றும் கொள்முதல் முறைகேடுகள்
சென்னை மடிப்பாக்கத்தைச் சேர்ந்த அகல் விளக்கு பதிப்பகம் மற்றும் பீனிக்ஸ் பப்ளிகேஷன்ஸ் நிறுவனங்களின் உரிமையாளர் ஆர். மோகன், பொது நூலக இயக்ககம், சென்னை அண்ணா நூற்றாண்டு நூலகம், கோவை பெரியார் அறிவுலகம் ஆகியவற்றின் அடையாளம் தெரியாத அரசு அதிகாரிகள் மற்றும் பிற நபர்கள் மீது வழக்குப் பதிவு செய்யப்பட்டுள்ளது. பாரதிய நியாய சன்ஹிதா (BNS) 2023-ன் கீழ் கூட்டுச்சதி, நம்பிக்கைத் துரோகம், மோசடி, ஆவணத் திருத்தம், ஊழல் தடுப்புச் சட்டம் மற்றும் பதிப்புரிமைச் சட்டம், 1957 ஆகியவற்றின் கீழ் பிரிவுகள் சேர்க்கப்பட்டுள்ளன.
கோவை பெரியார் அறிவுலகத்திற்குப் புத்தகங்கள் மற்றும் மின்-நூல்கள் வாங்க ரூ.50 கோடி ஒதுக்கப்பட்டது. 18.11.2025 அன்று அமைக்கப்பட்ட நான்கு நூலக அதிகாரிகள் கொண்ட ஒருங்கிணைப்புக் குழு, பரிந்துரைக் குழு பரிந்துரைத்த சுமார் 26,000 புத்தகங்களுக்கு அப்பால் பல நூல்களைத் தன்னிச்சையாகப் பட்டியலில் சேர்த்ததாக விசாரணையில் கூறப்பட்டுள்ளது. இந்தச் சேர்க்கைக்கு அதிகாரப்பூர்வ குறிப்புக் கோப்பில் பதிவு இல்லை.
ஒரே முகவரியில் செயல்பட்ட நிறுவனங்கள், அகல் விளக்கு பதிப்பகம் மூலம் 2,339 தலைப்புகளும், பீனிக்ஸ் பப்ளிகேஷன்ஸ் மூலம் 99 தலைப்புகளும் சமர்ப்பித்தன. இதில் 1,857 புத்தகங்களுக்கு கொள்முதல் ஆணை வழங்கப்பட்டு, அவை பெறப்பட்டன. 05.02.2026 அன்று மட்டும் 48 புத்தகங்களுக்கு ISBN பெறப்பட்டதாகவும், ஒரே எழுத்தாளர் பெயரில் நூற்றுக்கணக்கான தொடர்பில்லாத நூல்கள் பதிவு செய்யப்பட்டதாகவும் தெரிவிக்கப்பட்டுள்ளது.
Tamil Nadu library book purchase case விசாரணையில், இணையதளங்கள் மற்றும் ChatGPT போன்ற செயலிகளின் உதவியுடன் கற்பனையான எழுத்தாளர் பெயர்களில் தரமற்ற நூல்கள் உருவாக்கப்பட்டதும், ‘நாலடியார்’ மற்றும் ‘மதுரைக்காஞ்சி’ குறித்து தவறான தகவல்கள் இடம்பெற்றதும் தெரியவந்துள்ளது. நினா ஷிக் எழுதிய “Deepfakes: The Coming Infocalypse” நூல் வேறு பெயர்களில் வெளியிடப்பட்டதாகவும், ‘எமிலி லாசன்’ பெயரில் போலி இணையதள முகவரியுடன் ISBN இல்லாத நூல் விநியோகிக்கப்பட்டதாகவும் கூறப்பட்டுள்ளது. இதனால் ரூ.1,74,01,162 அரசு நிதி செலவிடப்பட்டதாகவும், பிற பதிப்பகங்கள் தொடர்பான விசாரணை விரிவுபடுத்தப்பட்டுள்ளதாகவும் தெரிவிக்கப்பட்டுள்ளது.

































