உள்துறை அமைச்சர் ஷபானா மஹ்மூத் நவம்பர் 2, திங்கட்கிழமை குடியேற்றக் கொள்கை மாற்றத் திட்டங்களை வெளியிட்டார். இந்தத் தகுதி விதிகள் தொடர்பான மாற்றங்கள் 2025 நவம்பரில் முதன்முதலில் விரிவாக வெளியிடப்பட்டிருந்தன. ஆலோசனைகளுக்குப் பிறகு அமல்படுத்தப்படும் விதிகள் குறித்து தற்போது முடிவு செய்யப்பட்டுள்ளது.
யாருக்கு குறுகிய காத்திருப்பு காலம்?
சில நிபந்தனைகளுடன் பராமரிப்புப் பணியாளர்கள், மருத்துவர்கள், செவிலியர்கள் மற்றும் ஆசிரியர்கள் உள்ளிட்ட சில பிரிவினருக்கு ஐந்து ஆண்டுகள் காத்திருப்பு காலம் தொடரும். ஆண்டுக்கு 125,141 பவுண்டுகளுக்கு மேல் வருமானம் பெறும் உயர் திறன் கொண்ட குடியேற்றத்தினர், குளோபல் டேலன்ட் அல்லது இன்னோவேட்டர் ஃபவுண்டர் விசா போன்ற பிரிவுகளில் இருந்தால், மூன்று ஆண்டுகளுக்குப் பிறகு தகுதி பெறலாம்.
புதிய UK permanent residence rules கீழ், விண்ணப்பத்துக்கு முன் உள்ள ஏழு ஆண்டுகளில் குறைந்தது ஐந்து ஆண்டுகள், ஆண்டுக்கு 12,571 பவுண்டுகள் வருமானம் பெற்றிருக்க வேண்டும். குறிப்பிட்ட அரசு நலத்திட்டங்களைப் பெற்றவர்கள் அல்லது குடியேற்ற விதிகளை மீறியவர்கள் குறைந்தது 20 ஆண்டுகள் காத்திருக்க வேண்டியிருக்கும்.
அரசின் மீள்குடியேற்றத் திட்டங்கள் மூலம் வந்த அகதிகள் ஐந்து ஆண்டுகளுக்குப் பிறகு தகுதி பெறலாம். மற்ற அகதிகளுக்கு காத்திருப்பு காலம் 10 ஆண்டுகளாக இருக்கும்; அவர்கள் வேலை செய்ய வேண்டும் அல்லது கல்வியைத் தொடர வேண்டும். சிறிய படகுகள் அல்லது பிற முறையற்ற வழிகளில் வந்த அகதிகளுக்கு, வேலை அல்லது கல்வியில் ஈடுபட்டாலும் 20 ஆண்டுகள் காத்திருப்பு காலம் நிர்ணயிக்கப்படும்.
பெற்றோருடன் வரும் 18 வயதுக்குட்பட்ட குழந்தைகள் வழக்கம்போல் அவர்களுடன் நிரந்தரக் குடியிருப்பு பெறலாம். பிரிட்டிஷ் குடிமக்களின் தகுதியான துணைவர், பெற்றோர் மற்றும் குழந்தைகளுக்கு ஐந்து ஆண்டு விதி தொடரும்.
