மேலும் விவசாயிகள் ரசாயன உரங்களின் பயன்பாட்டை 50 சதவீதம் வரை குறைக்க வேண்டும் என்றும் அவர் கேட்டுக்கொண்டுள்ளார். பிரதமரின் இந்த திடீர் அறிவுறுத்தல்கள் இந்திய பொருளாதாரத்தில் ஒரு தீவிர நெருக்கடி உருவாகிக் கொண்டிருப்பதற்கான சுட்டிக்காட்டாக இருக்கலாம் என்று நிபுணர்கள் கருதுகின்றனர். போர் தொடங்கிய சமயத்தில் அமெரிக்க டாலருக்கு எதிராக 91 ரூபாயாக இருந்த இந்திய ரூபாயின் மதிப்பு தற்போது 95 ரூபாய்க்கும் கீழ் சரிந்துள்ளதாக தெரிவிக்கப்படுகிறது. இதேவேளை Uday Kotak மக்கள் “மிகவும் கடினமான பொருளாதார சூழ்நிலைகளுக்கு” தயாராக இருக்க வேண்டும் என்று எச்சரித்துள்ளார். இந்தியா மட்டுமல்லாமல் உலகின் பல நாடுகளும் இந்த போரின் தாக்கத்தால் பாதிக்கப்பட்டுள்ளன.
சீனா தங்களது எண்ணெய் சுத்திகரிப்பு நிலையங்கள் எரிபொருள் ஏற்றுமதியை தற்காலிகமாக நிறுத்துமாறு உத்தரவிட்டிருந்தாலும் அந்நாட்டிலும் பெட்ரோல் விலைகள் உயர்ந்துள்ளன. மேலும் விமான எரிபொருள் விலை உயர்வால் சில சீன விமான நிறுவனங்கள் தங்களது சேவைகளை குறைத்துள்ளன. உலகளாவிய பணவீக்கம் மற்றும் பொருளாதார அழுத்தங்கள் அடுத்த சில மாதங்களில் மேலும் தீவிரமடையக்கூடும் என பொருளாதார ஆய்வாளர்கள் எச்சரித்து வருகின்றனர்.
