சவுதி அரேபிய மனிதவள மற்றும் சமூக மேம்பாட்டு அமைச்சகத்தால் வெளியிடப்பட்ட தொழிலாளர் சட்ட விதிகளின்படி ஒரே நிறுவனத்தில் ஐந்து ஆண்டுகளுக்குக் குறைவாகப் பணிபுரியும் ஊழியருக்கு ஆண்டுக்கு குறைந்தது 21 நாட்கள் சம்பளத்துடன் கூடிய ஆண்டு விடுப்பு வழங்கப்பட வேண்டும்.
ஒரே முதலாளியிடம் தொடர்ந்து ஐந்து ஆண்டுகள் பணியாற்றிய பின்னர் ஆண்டு விடுப்பு குறைந்தது 30 நாட்களாக அதிகரிக்கப்பட வேண்டும். இந்த விடுப்புக்கான சம்பளம் முன்கூட்டியே வழங்கப்பட வேண்டும்.
ஊழியர் தனது ஆண்டு விடுப்பை அதற்குரிய ஆண்டிலேயே பயன்படுத்த வேண்டும். பணியில் தொடரும் காலத்தில் அந்த விடுப்பை விட்டுக்கொடுத்து பணமாகப் பெற்றுக்கொள்ள முடியாது. எனினும் வேலை முடிவடையும் போது பயன்படுத்தப்படாத சட்டபூர்வ ஆண்டு விடுப்புகளுக்கான சம்பளத்தைப் பெற முடியும். நிறுவனம் விடுப்பு தொடங்கும் தேதியை குறைந்தது 30 நாட்களுக்கு முன்னர் ஊழியருக்கு அறிவிக்க வேண்டும்.
மருத்துவ விடுப்பு
மருத்துவ ரீதியாக நோய் உறுதிப்படுத்தப்பட்ட ஊழியர் ஒரு ஆண்டில் மொத்தம் 120 நாட்கள் வரை தொடர்ச்சியாகவோ அல்லது இடைவெளிகளுடனோ மருத்துவ விடுப்பு பெறலாம்.
- முதல் 30 நாட்களுக்கு முழுச் சம்பளம் வழங்கப்பட வேண்டும்.
- அடுத்த 60 நாட்களுக்கு சம்பளத்தின் நான்கில் மூன்று பங்கு, அதாவது 75 சதவீத சம்பளம் வழங்கப்பட வேண்டும்.
- அதற்குப் பின்னரான 30 நாட்கள் சம்பளமற்ற விடுப்பாக வழங்கப்படும்.
முன்னர் சில தகவல்களில் அடுத்த 60 நாட்களுக்கு மூன்றில் ஒரு பங்கு சம்பளம் என்று குறிப்பிடப்பட்டிருந்தாலும் அதிகாரப்பூர்வ விதியின்படி நான்கில் மூன்று பங்கு சம்பளமே வழங்கப்பட வேண்டும். நோய்வாய்ப்பட்ட ஊழியர் இந்த முழு விடுப்பு உரிமையைப் பயன்படுத்துவதற்கு முன்னர் நோயைக் காரணம் காட்டி நிறுவனத்தால் பணி நீக்கம் செய்ய முடியாது.
திருமண விடுப்பு
ஊழியரின் திருமணத்திற்காக ஐந்து நாட்கள் முழுச் சம்பளத்துடன் கூடிய விடுப்பு வழங்கப்பட வேண்டும். திருமணத்தை உறுதிப்படுத்தும் ஆவணங்களை நிறுவனம் கோரலாம்.
குடும்ப உறுப்பினர் மரண விடுப்பு
ஊழியரின் கணவர் அல்லது மனைவி, பெற்றோர், பாட்டன் அல்லது பாட்டி, பிள்ளைகள் அல்லது பேரப்பிள்ளைகள் உயிரிழந்தால் ஐந்து நாட்கள் முழுச் சம்பளத்துடன் விடுப்பு வழங்கப்பட வேண்டும்.
சகோதரர் அல்லது சகோதரி உயிரிழந்தால் மூன்று நாட்கள் முழுச் சம்பளத்துடன் விடுப்பு கிடைக்கும். இந்த நாட்கள் மரணம் நிகழ்ந்த தேதியிலிருந்து கணக்கிடப்படும்.
குழந்தைப் பிறப்பு விடுப்பு
ஒரு ஆண் ஊழியருக்கு குழந்தை பிறந்தால் பிறந்த தேதியிலிருந்து ஏழு நாட்களுக்குள் பயன்படுத்தக்கூடிய மூன்று நாட்கள் முழுச் சம்பளத்துடன் கூடிய விடுப்பு வழங்கப்பட வேண்டும்.
பெண் ஊழியருக்கு 12 வாரங்கள் முழுச் சம்பளத்துடன் மகப்பேறு விடுப்பு வழங்கப்பட வேண்டும்.
பிரசவத்திற்குப் பின்னரான ஆறு வாரங்கள் கட்டாய விடுப்பாகும். மீதமுள்ள ஆறு வாரங்களை மருத்துவச் சான்றிதழில் குறிப்பிடப்பட்டுள்ள பிரசவத் தேதிக்கு நான்கு வாரங்களுக்கு முன்னதாக ஆரம்பித்து ஊழியர் தேவைக்கேற்ப பயன்படுத்தலாம்.
இந்த விடுப்பை மேலும் ஒரு மாதம் சம்பளமின்றி நீடிக்கவும் முடியும். தொடர்ந்து பராமரிப்பு தேவைப்படும் நோயுற்ற அல்லது மாற்றுத்திறனுடைய குழந்தை பிறந்தால் மகப்பேறு விடுப்புக்குப் பின்னர் மேலும் ஒரு மாதம் முழுச் சம்பளத்துடன் விடுப்பு பெறலாம். அதனை மேலும் ஒரு மாதம் சம்பளமின்றி நீடிக்க முடியும்.
ஹஜ் விடுப்பு
முன்னர் ஹஜ் கடமையை நிறைவேற்றாத முஸ்லிம் ஊழியர் ஒரே முதலாளியிடம் குறைந்தது இரண்டு ஆண்டுகள் தொடர்ந்து பணிபுரிந்திருந்தால் பணிக்காலத்தில் ஒருமுறை 10 முதல் 15 நாட்கள் வரை சம்பளத்துடன் ஹஜ் விடுப்பு பெறலாம்.
இந்த விடுப்பில் ஈத் அல்-அத்ஹா விடுமுறையும் அடங்கும். நிறுவனத்தின் வேலைத் தேவைக்கு ஏற்ப ஆண்டுதோறும் ஹஜ் விடுப்பு பெறக்கூடிய ஊழியர்களின் எண்ணிக்கையை முதலாளி நிர்ணயிக்கலாம்.
தேர்வு விடுப்பு
நிறுவனத்தின் அனுமதியுடன் கல்வி நிறுவனத்தில் பயிலும் ஊழியர் மீண்டும் எழுதப்படாத கல்வியாண்டின் தேர்வுகளுக்கு உண்மையான தேர்வு நாட்களின் எண்ணிக்கைக்கு ஏற்ப முழுச் சம்பளத்துடன் விடுப்பு பெறலாம்.
மீண்டும் எழுதப்படும் பாடங்களுக்கான தேர்வு என்றால், அந்தத் தேர்வு நாட்கள் சம்பளமற்ற விடுப்பாக வழங்கப்படலாம்.
பொதுவாக தேர்வு விடுப்புக்கான விண்ணப்பம் குறைந்தது 15 நாட்களுக்கு முன்னதாக சமர்ப்பிக்கப்பட வேண்டும்.
சம்பளமற்ற விடுப்பு
ஊழியரும் நிறுவனமும் ஒப்புக்கொண்டால் இரு தரப்பும் தீர்மானிக்கும் காலத்திற்கு சம்பளமற்ற விடுப்பு பெற முடியும்.
இந்த விடுப்பு 20 நாட்களைத் தாண்டினால் இரு தரப்பும் வேறுவிதமாக ஒப்புக்கொள்ளாத நிலையில் வேலை ஒப்பந்தம் தற்காலிகமாக இடைநிறுத்தப்பட்டதாகக் கருதப்படலாம்.
அதிகாரப்பூர்வ விடுமுறைகள்
தனியார் நிறுவன ஊழியர்களுக்கு ஈத் அல்-பித்ர் பண்டிகைக்காக நான்கு நாட்களும், ஈத் அல்-அத்ஹா பண்டிகைக்காக அரஃபா நாள் முதல் நான்கு நாட்களும் அதிகாரப்பூர்வ விடுமுறையாக வழங்கப்பட வேண்டும்.
சவுதி தேசிய தினம் மற்றும் நிறுவனர் தினமும் அதிகாரப்பூர்வ விடுமுறைகளில் அடங்குகின்றன.
வாராந்த ஓய்வு நாளுடன் அதிகாரப்பூர்வ விடுமுறை இணைந்தால் அதற்கு முன்போ பின்னரோ மாற்று விடுமுறை வழங்கப்பட வேண்டும்.
அதிகாரப்பூர்வ விடுமுறை ஆண்டு விடுப்புடன் இணைந்தால் அந்த நாட்களின் எண்ணிக்கைக்கு ஏற்ப ஆண்டு விடுப்பு நீட்டிக்கப்பட வேண்டும். அதிகாரப்பூர்வ விடுமுறையில் பணிபுரிந்த நேரம் கூடுதல் வேலை நேரமாகக் கணக்கிடப்பட்டு அதற்குரிய இழப்பீடு வழங்கப்பட வேண்டும்.
விடுப்பு மறுக்கப்பட்டால் என்ன செய்யலாம்?
சட்டப்படி கிடைக்க வேண்டிய விடுப்பு அல்லது விடுப்புக்கான சம்பளம் வழங்கப்படாவிட்டால் ஊழியர் முதலில் தனது வேலை ஒப்பந்தம் சம்பளப் பதிவுகள் விடுப்பு விண்ணப்பம் நிறுவனத்தின் பதில் மற்றும் மருத்துவச் சான்றிதழ்கள் போன்ற ஆதாரங்களைப் பாதுகாத்துக்கொள்ள வேண்டும்.
அதன் பின்னர் இறுதியாக கம்பெனியை விட்டு நீங்கள் வெளியேறும் போது இந்த விடுமுறைகளுக்கான நிலுவைத் தொகைகள் கம்பெனியால் கொடுக்கப்படாவிட்டால்
சவுதி மனிதவள மற்றும் சமூக மேம்பாட்டு அமைச்சகத்தின் தொழிலாளர் புகார் சேவை அல்லது தொழிலாளர் தகராறு தீர்வு நடைமுறை மூலம் புகார் அளிக்கலாம்.
