இன்று (ஜூன் 7) நடைபெற்ற 72வது நாள் அகழ்வாய்வில் மேலும் எட்டு எலும்புக்கூடுகள் மீட்கப்பட்டுள்ளன. அவற்றில் இரண்டு சிறுவர்களுக்குரியவை என தெரிவிக்கப்பட்டுள்ளது. அரசாங்கத்தினால் வழங்கப்பட்ட 2.1 மில்லியன் ரூபாய் நிதி உதவியைத் தொடர்ந்து ஏழு மாத இடைவெளிக்குப் பின்னர் 2026 ஏப்ரல் 27ஆம் திகதி யாழ்ப்பாணம் நீதவான் செல்வநாயகம் லெனின்குமார் முன்னிலையில் மூன்றாம் கட்ட அகழ்வாய்வுப் பணிகள் மீண்டும் ஆரம்பிக்கப்பட்டன. இதற்கு முன்னர் 12 நாட்கள் நடைபெற்ற அகழ்வாய்வின் போது 261 மனித எலும்புக்கூடுகள் மீட்கப்பட்ட நிலையில் பணியாளர்களுக்கு ஓய்வு வழங்குவதற்காக பணிகள் தற்காலிகமாக நிறுத்தப்பட்டிருந்தன.
பின்னர் ஜூன் முதலாம் திகதி முதல் அகழ்வாய்வு மீண்டும் தொடங்கப்பட்டது. நீதிமன்ற உத்தரவின் பேரில் தடயவியல் தொல்பொருள் ஆய்வாளர் பேராசிரியர் ராஜ் சோமதேவ மற்றும் யாழ்ப்பாண சட்ட வைத்திய அதிகாரி செல்லையா பிரணவன் ஆகியோரின் மேற்பார்வையில் இந்த அகழ்வாய்வு நடைபெற்று வருகிறது. மனித எலும்புக்கூடுகளுடன் குழந்தைகளின் பால் போத்தல்கள், பொம்மைகள், விளையாட்டுப் பொருட்கள், சிறுவர்களின் காலணிகள், பாடசாலைப் பைகள் மற்றும் நாணயங்கள் உள்ளிட்ட 100-க்கும் மேற்பட்ட பொருட்களும் கண்டெடுக்கப்பட்டுள்ளமை இந்த புதைகுழியின் முக்கியத்துவத்தையும் மர்மத்தையும் மேலும் அதிகரித்துள்ளது.
