அமெரிக்க அதிபர் டொனால்ட் டிரம்ப் தனது ஆலோசகர்களிடம், ஈரானுக்கு எதிராக நடந்து வரும் கடற்படை முற்றுகையை (blockade) நீண்ட காலத்திற்கு தொடரத் தயாராக இருக்குமாறு உத்தரவிட்டதாக தகவல்கள் வெளியாகியுள்ளன.

இந்த முடிவு இரு நாடுகளுக்கிடையேயான அணு திட்டம் மற்றும் பிராந்திய பாதுகாப்பு தொடர்பான கடும் பதற்றத்தின் பின்னணியில் எடுக்கப்பட்டுள்ளது.

ஈரானின் எண்ணெய் ஏற்றுமதியை கட்டுப்படுத்துவதன் மூலம் அதன் பொருளாதாரத்தை மேலும் பலவீனப்படுத்துவது இந்த நடவடிக்கையின் முக்கிய நோக்கமாகும்.

இந்த முற்றுகை காரணமாக ஈரான் ஏற்றுமதி செய்ய முடியாத எண்ணெயை சேமிப்பதில் சிரமங்களை எதிர்கொண்டு வருகிறது என்றும் கூறப்படுகிறது.

மேலும் ஈரான் சமீபத்தில் சமரசத் திட்டம் ஒன்றை முன்வைத்தது. அதில் ஹார்முஸ் கடல்சந்தியை மீண்டும் திறப்பது போன்ற பரிந்துரைகள் இருந்தாலும், அமெரிக்கா அதை நிராகரித்துள்ளது.

காரணம், அந்த திட்டத்தில் அணு ஆயுத கட்டுப்பாடு தொடர்பான உறுதியான நிபந்தனைகள் இல்லை என்று டிரம்ப் நிர்வாகம் கருதுகிறது.

இந்த முற்றுகை உலகளாவிய பொருளாதாரத்திலும் தாக்கத்தை ஏற்படுத்தியுள்ளது. குறிப்பாக ஹார்முஸ் கடல்சந்தி வழியாக எண்ணெய் போக்குவரத்து குறைந்ததால் உலக எண்ணெய் விலைகள் உயர்ந்து வருகின்றன.

இந்நிலையில் அமெரிக்காவின் இந்த கடுமையான அழுத்தம் ஈரானை பேச்சுவார்த்தைக்கு கொண்டு வருமா அல்லது மேலும் பதற்றத்தை அதிகரிக்குமா என்பது குறித்து சர்வதேச அளவில் கவலை அதிகரித்துள்ளது.

இரு தரப்புகளுக்கும் இடையிலான பேச்சுவார்த்தைகள் தற்போது நிலைத்தடை ஏற்பட்ட நிலையில் உள்ளன.