மருத்துவரை அழைத்து தாக்கியதாக புகார்
திருப்பூணித்துறை ஹில்பேலஸ் பகுதியில் வசிக்கும் அதுல்யா சந்திராவின் நெருங்கிய பெண் உறவினருக்கு, கொச்சி தனியார் மருத்துவமனையில் பணியாற்றும் 41 வயது மருத்துவர் பாலியல் தொல்லை அளித்ததாகக் கூறப்படுகிறது. இதையடுத்து, போலீசில் புகார் அளிக்காமல் மருத்துவரைப் பழிவாங்கவும் பணம் பறிக்கவும் அதுல்யா தனது நண்பர்களுடன் திட்டமிட்டதாகப் புகாரில் தெரிவிக்கப்பட்டுள்ளது.
கடந்த திங்கள்கிழமை மாலை, உறவினரின் உடல்நிலை மோசமடைந்துவிட்டதாகக் கூறி மருத்துவரை பொன்னுருன்னி ஜூனியர் ஜனதா சாலையில் உள்ள அடுக்குமாடிக் குடியிருப்புக்கு அவர் வரவழைத்ததாகக் கூறப்படுகிறது. அங்கு பதுங்கியிருந்தவர்கள் மருத்துவரை நான்கு மணி நேரத்துக்கும் மேலாகத் தாக்கி, ரூ.1 கோடி கேட்டு மிரட்டியதாக போலீஸார் தெரிவித்தனர். மறுநாள் ரூ.25 லட்சம் தருவதாக அவர் ஒப்புக்கொண்ட பின்னர், இரவு 10.30 மணியளவில் விடுவிக்கப்பட்டதாகக் கூறப்படுகிறது.
தாக்குதலில் காயமடைந்த மருத்துவர் களமசேரி தனியார் மருத்துவமனையில் சிகிச்சை பெற்றார். அவரிடமிருந்து ரூ.3 லட்சம் மதிப்புள்ள இரண்டு உயர்ரக செல்போன்கள், ஸ்மார்ட் வாட்ச் மற்றும் இயர்பாட்ஸ் பறிக்கப்பட்டதாகவும் புகார் உள்ளது. Kerala doctor assault case-ல் அதுல்யா சந்திரா, நடிகரும் தயாரிப்பு நிர்வாகியுமான பி. பிபின் பெரும்பள்ளி, கே.பி. விஷ்ணு ஆகியோர் கைது செய்யப்பட்டுள்ளனர். தலைமறைவாக உள்ள மேலும் 9 பேரை போலீஸார் தேடி வருகின்றனர்.
