ஆலப்புழா மாவட்டம் ஹரிப்பாடு அருகே பாயிப்பாடு பகுதியைச் சேர்ந்த தனேஷ் நாயர், ‘டேனி’ என்றழைக்கப்படுகிறார். 31 வயதான அவர், 2015 முதல் 2018 ஆம் ஆண்டு வரை ஜெர்மனியில் தங்கி வேளாண் வணிகம் பயின்றதாகத் தெரிவிக்கப்பட்டுள்ளது. 2018ஆம் ஆண்டு கேரள வெள்ளத்துக்குப் பிறகு திரும்பிய அவர், கர்நாடகாவின் மைசூர் அருகே நஞ்சன்கூட்டில் நிலங்களை குத்தகைக்கு எடுத்து வாழைத்தோட்டம் நடத்தி வந்தார்.
லாரி சோதனையில் போதைப்பொருட்கள் பறிமுதல்
விவசாயத்தில் நவீன தொழில்நுட்பங்களைப் பயன்படுத்தியதற்காக தனேஷுக்கு 2023ஆம் ஆண்டு கேரள அரசின் சிறந்த இளம் விவசாயி விருது வழங்கப்பட்டது. இதனிடையே, வாழைத்தார்களுக்குள் ரசாயனப் போதைப்பொருட்களை மறைத்து லாரிகள் மூலம் கேரளாவுக்கு கொண்டு வருவதாக போலீஸாருக்கு ரகசிய தகவல் கிடைத்தது.
ஆலுவா டி.எஸ்.பி. பைஜு பவுலோஸ் தலைமையிலான தனிப்படை போலீஸார் அங்கமாலியில் நடத்திய வாகனச் சோதனையில் தனேஷ் சிக்கினார். அவரிடமிருந்து 803 கிராம் ஹாஷிஷ் ஆயிலும் 8 கிராம் எம்.டி.எம்.ஏவும் பறிமுதல் செய்யப்பட்டன. அவரது செல்போனில் வாழைத்தார்களுக்குள் போதைப்பொருள் மறைக்கும் முறைகள் குறித்த வீடியோக்களும், இன்ஸ்டாகிராம் வழி பணப் பரிவர்த்தனைக்கான ஆதாரங்களும் கிடைத்ததாக போலீஸார் தெரிவித்துள்ளனர்.
முன்னதாக ஆலுவாவில் 185 கிராம் எம்.டி.எம்.ஏவுடன் ஹரிகிருஷ்ணனும், தோப்பும்படியில் 7 கிராம் போதைப்பொருளுடன் ஷினு செபஸ்டியனும் கைது செய்யப்பட்டனர். ஹரிகிருஷ்ணனின் செல்போன் உரையாடல்கள் மற்றும் சமூக வலைத்தளப் பதிவுகளை ஆய்வு செய்தபோது தனேஷின் தொடர்பு தெரியவந்ததாக போலீஸார் கூறினர். இந்த Kerala drug trafficking arrest தொடர்பாக தொடர்ந்து விசாரணை நடைபெற்று வருகிறது.
